Ստամբուլի հայկական «Ակօս» թերթի փոխանցմամբ՝ քրդամետ «Ժողովուրդների դեմոկրատական» կուսակցության (ԺԴԿ) առաջնորդ Սելահաթթին Դեմիրթաշը կոչով դիմել է Թուրքիայի կառավարությանը և «Քրդստանի աշխատավորական» կուսակցությանը (PKK)` կապված հուլիսի 15-ին երկրում իրականացված ռազմական հեղաշրջման փորձի հետ:
Դեմիրթաշը կուսակիցների առջև ունեցած ելույթում հայտարարել է, թե ներկայիս Թուրքիան այն Թուրքիան չէ, որը գոյություն ուներ հուլիսի 15-ից առաջ և անհրաժեշտ է նոր գնահատական տալ ստեղծված իրավիճակին:
Նա հիշեցրել է, որ Թուրքիայի նախագահ Ռեջեփ Էրդողանը զինվորականների անձեռնմխելիությունը վավերացրել է հուլիսի 14-ին, որի հաջորդ օրն էլ իրականացվել է ռազմական հեղաշրջման փորձը:
Դեմիրթաշը հույս է հայտնել, որ այժմ կվերացվի զինվորականներին ընձեռված անձեռնմխելիությունը: Դեմիրթաշը կարևորել է դատելու հարցում խորհրդարանի շենքը և Ջիզրեն, Նուսայբինը ռմբակոծած օդաչուների միջև տարբերություն չդնելը:
