Ճապոնական ավտոմոբիլային Toyota Motor ընկերությունն ԱՄՆ-ում հետ է կանչում ևս 1.58 մլն ավտոմեքենա՝ փոխելու համար Takata ընկերության՝ պոտենցիալ վտանգավոր թերությամբ անվտանգության բարձիկները։ Այս մասին հայտնում է Kyodo գործակալությունը։
Նշվում է, որ ընդհանուր առմամբ այդ թերության պատճառով ԱՄՆ-ում Toyota Motor-ը հետ է կանչել 2006-2011թթ. 9 մոդելների 4.7 մլն մեքենա, այդ թվում՝ Toyota Yaris և Lexus IS։
Նշվում է, որ որոշ դեպքերում անվտանգության բարձիկները մետաղական դետալներ են «կրակել» ուղևորների վրա։ Բարձիկների թերությունը կապում են ողջ աշխարհում ավելի քան 10 մարդու մահվան հետ։
Ավտոմեքենաների համար անվտանգության համակարգեր արտադրող ճապոնական Takata-ն 2014 թվականին հայտնվել էր սկանդալի կենտրոնում, երբ հայտնի էր դարձել, որ նրա արտադրած անվտանգության բարձիկները ինքնակամ կարող են բացվել մեքենայի շարժի ընթացքում։