Մեր հիմնական խնդիրն էր` օգնել կողմերին՝ կայունացնելու իրավիճակը և ձեռնարկելու միջոցներ, որոնք ուղղված կլինեն նրան, որ ռազմական գործողություները չկրկնվեն»: Այս մասին այսօր՝ ապրիլի 9-ին, Երևանում կայացած մամուլի ասուլիսի ժամանակ ասաց ԵԱՀԿ Մինսկի խմբի ռուսաստանցի համանախագահ Իգոր Պոպովը:
Նա նշեց, որ համանախագահների մանդատի մեջ չի մտնում հետաքննության անցկացումը, թե ով է սկսել առաջինը և ով է պատասխանատու կատարվածի համար:
«Կողմերը մտադիր են, համենայնդեպս, պատրաստակամություն են հայտնում պահպանելու հրադադարը: Խոսել ենք այն մասին, թե ինչ է պետք անել` խաղաղությունը պահպանելու համար: Մեր հիմնական խնդիրն է` կողմերին հրավիրել բանակցային սեղանի շուրջ»:
Անդրադառնալով բանակցային սեղանին դրված առաջարկներին՝ Ի. Պոպովը նշեց, որ այսպես կոչված «Լավրովի փաստաթուղթ» գոյություն չունի. «Կան համանախագահների առաջարկներ, որոնք տարիներ շարունակ քննարկվել են։ Կա մի քանի տարբերակ, սակայն դրանք բոլորն էլ հիմնված են 3 սկզբունքների և 6 բաղադրիչների վրա, որոնց մասին բազմիցս հայտարարել էին համանախագահ երկրների ղեկավարները՝ ուժի չկիրառում, ազգերի ինքնորոշման իրավունք և տարածքային ամբողջականություն։ 6 կետերից 2-ը կարևորագույնն են՝ տարածքների վերադարձ և Ղարաբաղի կարգավիճակի որոշում: Հենց դրանց մասին էլ խոսվել է, այսպես կոչված, Լավրովի փաստաթղթում։
Պոպովի խոսքով՝ խաղաղարար գործողությունը՝ խաղաղապահների տեղակայումը հնարավոր կլինի եզրափակիչ փուլում, այն բանից հետո, երբ հակամարտության կարգավորման համաձայնագիր կկնքվի։
Մանրամասները՝ տեսանյութում: