Լոռու մարզի ընդհանուր իրավասության դատարանում Նարինե Հովակիմյանի նախագահությամբ ավարտվել է Ալեքսանդր Պ.-ի գործի դատական քննությունը:
Ըստ մեղադրանքի՝ 31-ամյա Ալեքսանդրը 2012 թվականի սեպտեմբերի 3-ից մինչև 25-ը իր բնակարանում պարբերաբար սեռական հարաբերություններ է ունեցել 13-ամյա Մայայի (անունը փոխված է) հետ: Ալեքսանդրը մեղավոր է ճանաչվել ՀՀ քրեական օրենսգրքի 141 հոդվածի 3-րդ մասի 2-րդ կետով:
Նախկինում Ալեքսանդրը հասցրել է հինգ անգամ դատվել հայաստանյան դատարաններում, մի անգամ էլ Ռուսաստանում՝ 2013 թվականին:
Անչափահասի հետ սեռական հարաբերություններ ունենալու այս գործով հաստատված է համարվել հետևյալը:
Ալեքսանդրը հայաստանյան վերջին պատժից ազատվել է 2012 թվականի հուլիսի 27-ին: Նա Տաշիր քաղաքում ծանոթացել է անչափահաս՝ 13 տարեկան Մայայի հետ:
31-ամյա տղամարդը համակրել է դեռահաս աղջկան ու նրա հետ մտերմություն է արել «ամուսնության նպատակով»: Իր մտադրության մասին նույնիսկ հայտնել է Մայայի մայրիկին ու տատիկին, ովքեր դեմ չեն եղել, որ Մայան հանդիպի Ալեքսանդրի հետ՝ պայման դնելով, որ Մայան կարող է ամուսնանալ դպրոցն ավարտելուց հետո…
Ալեքսանդրի ու Մայայի մտերմությունը շարունակվել է: Աղջիկը հաճախ է գնացել Ալեքսանդրի բնակարան:
Հերթական այցելության ժամանակ Ալեքսանդրը Մայային հայտնել է, որ պատրաստվում է մեկնել Ռուսաստան: Իսկ դրանից առաջ ցանկանում է, որ իրենք սեռական հարաբերություն ունենալ: Մայան դեմ չի եղել: Նրանք փոխադարձ համաձայնությամբ սեռական հարաբերություն են ունեցել այդ օրը ու հետագա օրերին՝ առնվազն՝ 10 անգամ: Սեպտեմբերի վերջին Ալեքսանդրը մեկնել է Ռուսաստան՝ մոռանալով Մայայի հետ ամուսնանալու ցանկության մասին:
Ընդհանուր իրավասության դատարանում Ալեքսանդր Պ.-ն իրեն մեղավոր է ճանաչել, միջնորդել է գործը քննել արագացված կարգով:
Մեղադրողը, տուժողը և նրա օրինական ներկայացուցիչը չեն առարկել արագացված կարգի կիրառման դեմ:
Դատարանը հաշվի է առել, որ Ալեքսանդրը, իմանալով, որ Հայաստանում հետախուզման մեջ է, կամովին Ռուսաստանից եկել է Հայաստան՝ նախապես իր գալստյան մասին հայտնելով ոստիկաններին: Նա բերման է ենթարկվել «Զվարթնոց» օդանավակայանից:
Դատարանն արձանագրել է հանցագործությունների կատարման վտանգավոր ռեցիդիվ Ալեքսանդրի կողմից:
Ալեքսանդրի շահերի պաշտպանը դատարանին է ներկայացրել Ալեքսանդրի ու Մայայի ամուսնության վկայականը: Նրանց ամուսնությունը գրանցվել է 2016 թվականի փետրվարի 1-ին: Պաշտպանը միջնորդել է Ալեքսանդրի նկատմամբ կիրառել պայմանական դատապարտություն՝ հաշվի առնելով, որ կողմերն ամուսնացել են, ընտանիք են կազմել:
Դատարանն արձանագրել է, որ դատաքննությունից օրեր առաջ տուժողի հետ գրանցված ամուսնությունը առանձին վերցրած՝ չի կարող հիմք լինել ամբաստանյալի նկատմամբ պայմանական դատապարտություն կիրառելու համար:
Հանցավոր արարքի կատարման պահին տուժող աղջիկը եղել է 13 տարեկան: Նրա հետ բազմիցս սեռական հարաբերություն ունենալով՝ մի քանի անգամ դատված 31-ամյա տղամարդը հեռացել է Հայաստանից, մեկնել է Ռուսաստան: Միայն այն բանից հետո է վերադարձել, երբ իմացել է, որ հետախուզվում է Հայաստանում:
Դատարանն արձանագրել է, որ տուժող Մայան անբարենպաստ ընտանիքի երեխա է: Նրա ծնողներն ամուսնալուծվել են, աղջկա խնամքով հիմնականում զբաղվել է տատիկը: Մյուս երկու քույրերին մոր նախաձեռնությամբ տեղափոխել են մանկատուն:
Մի քանի անգամ դատված Ալեքսանդրի հետ ծանոթանալով՝ Մայան սկսել է հաճախակի բացակայել տանից, դասերից, կտրուկ սկսել է վատ սովորել: Իսկ երբ Ալեքսանդրը մեկնել է Ռուսաստան, Մայան տեղափոխվել է մանկատուն:
Նախաքննության ընթացքում տուժող Մայայի նկատմամբ նշանակվել է դատահոգեբանական փորձաքննություն, որի ժամանակ աղջիկը հայտնել է, որ առաջին սեռական հարաբերությունն ունեցել է Ալեքսանդրի հետ, նրա առաջարկությամբ: Միայն դրանից հետո է իմացել, որ Ալեքսանդրն ամուսնացած է, ունի երկու երեխա:
Ալեքսանդրն ասել է, թե կնոջը չի սիրում, պատրաստ է ամուսնանալ Մայայի հետ: Աղջիկն էլ հավատացել է:
Փորձագիտական եզրակացության համաձայն՝ Մայան, ելնելով իր տարիքային, , անհատական, հոգեբանական առանձնահատկություններից, ինտելեկտուալ և անձնային զարգացման մակարդակից՝ կարող էր հասկանալ իր նկատմամբ կատարված գործողությունների բնույթն ու նշանակությունը, բայց նա սեռական հարաբերությունների, սեռահասունացման, սեռավարակների, վերարտադրողական ֆունկցիայի վերաբերյալ ունի սահմանափակ տեղեկացվածություն:
Դատարանը նշել է Տաշիրի քաղաքապետի կողմից Ալեքսանդրին տրված խիստ դրական բնութագիրը, որտեղ ասված է, թե Ալեքսանդրը մեծ հարգանք է վայելում համաքաղաքացիների շրջանում, բարոյական բարձր հատկանիշներով օժտված հայրենասեր ու քաղաքականապես հասուն այր է:
Միաժամանակ, ըստ Ալեքսանդրի կենսագրական տվյալների, դատարանն արձանագրել է, որ նա նախկինում հինգ անգամ դատապարտվել է առավելապես ուրիշի գույք հափշտակելու համար, վերջին անգամ Ռուսաստանում դատապարտվել է ավազակության համար:
Ուստի դատարանը քաղաքապետի կողմից տրված բնութագիրը չի դիտարկել որպես ամբաստանյալի պատասխանատվությունն ու պատիժը մեղմացնող հանգամանք: Նման հանգամանք դատարանը չի դիտել նաև դատապարտվելուց օրեր առաջ ամբաստանյալի ու տուժողի կնքած ամուսնությունը:
Ալեքսանդր Պ.-ն մեղավոր է ճանաչվել անչափահասի հետ սեռական հարաբերություններ ունենալու համար և դատապարտվել է 1 տարի 3 ամիս 26 օր ժամկետով: Պատժի սկիզբը կհաշվվի Ալեքսանդրին փաստացի կալանքի տակ առնելու օրից:
