Մահացած ծննդկան Մերի Մարգարյանի գործով արդեն մեղադրյալ Շուշանիկ Բախշյանի փաստաբանների վերջին ասուլիսում հնչած մի քանի ձևակերպումների պատճառով Մերի Մարգարյանի հայրը՝ Վաղինակ Մարգարյանը, փաստաբան Սիրունյանի նկատմամբ կարգապահական վարույթ սկսելու համար դիմում է ներկայացնել Փաստաբանական պալատ:
Ալեքսանդր Սիրունյանը, մինչդեռ, իր նկատմամբ սկսված կարգապահական վարույթի մասին ոչինչ չի մտածում: Մամուլի ասուլիսում նա ասաց, որ իր ձևակերպումներից չի հրաժարվում: Ասում է՝ այն արտահայտությունները, որոնք տուժող կողմին դուր չեն եկել, փորձագետի եզրակացության մեջ են գրված:
Փաստաբաններ Ալեքսանդր Սիրունյանն ու Մարինե Թովմասյանը այս գործում միայն մեկ ընդհանուր հարցում են համակարծիք. Շուշանիկ Բախշյանի անվան կողքին այլ անուններ են պակասում:
Ալեքսանդր Սիրունյանին հետաքրքիր է, թե ինչու են Շուշանիկ Բախշյանի նախկին ծննդկանների տխուր պատմությունները պարբերաբար նոր շունչ առնում ու հայտնվում լրահոսում: Մերի Մարգարյանի հայրը ժխտում է, որ ինքը որևէ կապ ունի Շուշանիկ Բախշյանից տուժած այլ ծննդկանների հետ:
Նախօրեին Ալեքսանդր Սիրունյանը իր ֆեյսբուքյան էջում հրապարակել է շուրջ 250 հիվանդների և հղի կանանց դիմումները՝ ուղղված դատախազին և քննչական կոմիտեին, Շուշանիկ Բախշյանի նկատմամբ կիրառվող գործողությունները համարելով ոտնձգություն և պահանջ ներկայացնելով ապօրինի ոտնձգությունները դադարեցնելու նպատակով: