«Առաջին լրատվական»-ի զրուցակիցն է ՀՅԴ Հայ դատի եւ քաղաքական գրասենյակի ղեկավար, ՀՅԴ բյուրոյի անդամ Կիրո Մանոյանը
– Վերջերս ԱՄՆ-ում ձերբակալվեց հայկական հանցախումբ, Վրաստանում ձերբակալվել են ՀՀ քաղաքացիներ` հարստացված ուրանի վաճառքի պահին: Ընդ որում, այդ ուրանը Վրաստան էր տեղափոխվել Երեւանից` Երեւան-Թբիլիսի գնացքով: Ինչպե՞ս կմեկնաբանեք այդ դեպքերը, արդյո՞ք դրանք չեն ազդում Հայաստանի վարկի վրա:
– Չեմ կարծում, որ դա ազդեցություն ունենա Հայաստանի վարկի վրա, բայց կարծում եմ` որոշակի ազդեցություն կթողնի հայության վարկի վրա, քանի որ այդ ամենի արդյունքում հնարավոր է` որոշ կարծրատիպեր ձեւավորվեն հայության մասին: Այնպես որ, այս երեւույթները կարող են որոշակի վնաս հասցնել, բայց համոզված եմ, որ բոլոր ազգերի մեջ էլ բոլոր տեսակի մարդիկ կան: Մենք հայ ենք, լսում ենք հայերի ձերբակալությունների մասին, բայց չենք լսում, որ այլազգիներ են ձերբակալվում ինչ-ինչ քրեական գործերով: Դրա համար էլ չենք կարող ճիշտ պատկերացում ունենալ ու համեմատել: Այնպես չէ, որ հայերն ավելի շատ քրեական տարրեր ունեն, քան ուրիշները, ուղղակի` հայերի ձերբակալության մասին ենք մենք լսում:
– Հայաստանի տարածքով հարստացված ուրան է տեղափոխվել Վրաստան, տեղափոխող քաղաքացիներն էլ ձերբակալվել են: Ձեր կարծիքով, Հայաստանի մասին կարծիք չի՞ ձեւավորվի, որ այն տարանցիկ ուղի է նման նյութերի համար:
– Այդ ուրանը Հայաստանից չէ եւ Հայաստան էլ չի եկել: Կարծեմ` Բելառուսից է եկել, հետխորհրդային երկրներից մեկից: Այն Հայաստան չի եկել: Այնպիսի տպավորություն է, որ սա առաջին դեպքն է, որ ինչ-որ տեղից ուրան է տեղափոխվում: Սա ոչ առաջին, ոչ էլ վերջին դեպքն է:
– Այսինքն` այդքան հե՞շտ է հարստացված ուրան տեղափոխելը:
– Ես չեմ ասում` հեշտ է: Բայց սա առաջին դեպքը չի, ոչ էլ վերջինը: Ու շատ լավ է, որ ձերբակալվել են ուրան տեղափոխողները:
– Իսկ ամերիկյան պաշտոնյաների հայտարարությունները, թե հայկական հանցախմբի գումարները ներդրվել են ՀՀ-ում անշարժ գույքի շուկայում` ինչպե՞ս հասկանալ:
– Վստահ եմ, որ ամերիկյան շուկայում էլ գումարներ են ներդրվել: Շատ քրեական գումարներ կան աշխարհի շատ երկրներում, որ լվանալու համար փորձում են ներդնել:
– Որեւէ հետեւանք կունենա՞, արդյոք, այս ամենը, որեւէ գործողություն կհետեւի՞ միջազգային հանրության, ԱՄՆ կողմից:
– Այնպես եք խոսում, ոնց որ սա առաջին դեպքն է: Կարող է առաջինն է, որ հայեր են ընդգրկված նման գործում` այդքան մեծ ծավալով: Սակայն սրանից ավելի մեծ դեպքեր էլ են կատարվում, որոնց մոտ սա չնչին է: Ամենապարզ օրինակը 50 մլրդ-ի պատմությունն է, որ կորցրեց ԱՄՆ-ը: Այդ ո՞ւր է կորել այդ գումարը, մի երկիր գնացել է, չէ՞: Եթե չի լվացվել, ապա ո՞ւր են գնացել այդ գումարները, եթե չի լվացվել` ի՞նչ է եղել: Ինչո՞ւ եք մտահոգվում: Հարց չեղած` հարց եք ման գալիս: Սա ոչ առաջինն է, ոչ վերջինը:
– Միջազգային հանրության լեքսիկոնի մեջ է մտել «հայկական մաֆիա» արտահայտությունը, որին, ըստ Նյու Յորքի դաշնային դատախազ Փրիթ Բհարարայի, կնախանձեր անգամ սիցիլիական մաֆիան:
– Մենք էլ ենք նպաստել դրան` մեր սերիալներով: Այդ ժամանակ` սերիալ նկարելիս, վատ չենք զգում, ասում ենք` կարծիքի ազատություն: Ուրեմն` դա է կարծիքի ազատությունը:
– Ձեր կարծիքով, ԱՄՆ-ում ձերբակալված հայկական հանցախումբն արդյո՞ք ազդեցություն չի ունենա նաեւ ԼՂ խնդրի վրա, երբ սկսեն ճնշումներ գործադրել ՀՀ իշխանությունների վրա` պարբերաբար թմբկահարելով հայկական հանցախմբի եւ ՀՀ իշխանությունների հետ կապի մասին:
– Ղարաբաղի հարցում երկու մարդու պատճառով ճնշումներ չեն գործադրի, այլ ուրիշ հարցերով ճնշումներ կգործադրեն: Հայաստանի վարկանիշի հետ այդ ամենը հեռվից կապ ունի միայն եւ Ղարաբաղի վրա չի ազդի: Դրանում կարող եք հանգիստ լինել:
– Այսինքն` այս ամենը ձեզ համար մտահոգիչ չէ՞:
– Չէ, մտահոգիչ չէ: Եվ մտահոգիչ չի լինի այնքան ժամանակ, քանի դեռ մեր իշխանությունները համագործակցում են ԱՄՆ իշխանությունների հետ:
– Այսինքն` դուք հավատում եք իշխանությունների ազնվությանը` ամերիկացիների հետ համագործակցության առումով:
– Համագործակցության մասին հայտարարել են, սակայն հակառակը ԱՄՆ իշխանությունների կողմից չեմ լսել, որ դժգոհ են ՀՀ իշխանություններից: Ես դատախազություն չեմ, որ իմանամ` ով ինչ է անում, բայց եթե չհամագործակցեին, ամերիկացիները պետք է այդ մասին հայտարարություն անեին: Ես նման քաղաքական հայտարարություն դեռ չեմ լսել:
