Նախօրեին Սերժ Սարգսյանի կողմից նախագահական նստավայր հրավիրվածների թվում էր նաև ՀՀԿ խմբակցության պատգամավոր Կարինե Աճեմյանը: «Այնպիսի ակնառու արդյունքներ էին, որ կարելի էր դրա մասին խոսել,- «Առաջին լրատվական»-ի հետ զրույցում նշեց Կ. Աճեմյանը,- շատ անելիք կա, դրա մասին էր խոսքը: Սա այն մոդելը չէ, որ ընդունվեց և վերջ, կարելի է մի կողմ դնել, սա պետք է կյանքի կոչել: Իրավական բոլոր հիմքերը պետք է ստեղծվեն, որպեսզի կարողանանք սահուն, առանց ցավոտ գործընթացների իրականացնենք և՛ 2017թ. պառլամենտական ընտրությունները, և՛ հետագայում համակարգը ներդնենք»:
Կարինե Աճեմյանի գնահատմամբ՝ մանր-մունր ընտրակեղծիքներ տեղի են ունեցել, ոմանք արջի ծառայություն են մատուցել, բայց հիմնականում քվեարկությունը թափանցիկ, արդար էր:
Վերջերս իր տված ասուլիսում Սերժ Սարգսյանը չհերքեց, որ հնրավոր է իրեն վարչապետի պաշտոնում տեսնենք: Հարցին՝ որքանո՞վ է ազնիվ նրա կողմից այս մոտեցումը, եթե մինչ այդ նա նշել էր, որ ո՛չ ԱԺ նախագահ, ո՛չ էլ վարչապետ է ուզում դառնալ, ՀՀԿ պատգամավորը պատասխանեց. «Կխնդրեի առհասարակ գնահատականներ չտալ մեր նախագահի ասածներին: Կյանքը այնքան արագ փոխվում է, որ նույնիսկ չենք կարող ասել, թե 10 օր հետո ինչ կլինի: Մեր կուսակցության որոշումների մեջ ոչ ոք չպետք է խառնվի, դրանք մեր որոշումներն են, դա նախագահի որոշումն է»:
Անդրադառնալով այն փաստին, որ հասարակության մեջ կա վստահության դեֆիցիտ թե՛ իշխանության, թե ընդդիմության հանդեպ՝ Կ. Աճեմյանն ասաց, որ դա մենթալիտետի հետ է կապված. «Պայմանավորված է նրանով, որ մենք շատ ծայրահեղական ենք, մենք անընդհատ սև ու սպիտակի մեջ որոնումների մեջ ենք»:
Մանրամասները՝ տեսանյութում:
