Ռուսական TASS լրատվական գործակալության փոխանցմամբ՝ Թուրքիայի նախագահ Ռեջեփ Էրդողանը լրագրողների հետ զրույցում հերքել է Ռուսաստանի ղեկավարության հնչեցրած մեղադրանքը, թե Թուրքիան նավթ է գնում ԴԱԻՇ-ից:
«Համաշխարհային առաջնորդները չեն հավատում ԴԱԻՇ-ից Թուրքիայի նավթ գնելու մասին տեղեկությանը։ Նրանք սկսել են զրպարտանքի խոշոր կամպանիա։ Սակայն համաշխարհային առաջնորդները չեն հավատում այդ մեղադրանքներին։
Պուտինի խոսքերում այն մասին, որ Թուրքիան նավթ է գնում ԴԱԻՇ-ից, չկա որևէ համոզիչ բան։ Եթե Պուտինն ապացուցի դա, ես պատրաստ եմ լքել իմ պաշտոնը։ Իսկ եթե ոչ, ապա արդյոք նա պատրա՞ստ է ինքը հեռանալ»,- ասել է նա։
Էրդողանը հիշեցրել է, որ նախկինում նման մեղադրանքներ հնչեցրել է նաև իրանական կողմը. «Հայտնի է, թե Թուրքիան որ տեղերից է նավթ գնում։ Հայտնի է, թե ով է նավթ գնում ԴԱԻՇ-ից։ Օրինակ՝ նշում են Ջորջ Հասվանիի անունը, որը Ռուսաստանի քաղաքացի է և միաժամանակ սիրիացի։ Նա նավթը գնում է ԴԱԻՇ-ից և վաճառում է Ասադին։ Այդ մասին հայտնել են ամերիկյան աղբյուրները»։
Էրդողանը վերստին հայտարարել է, որ իրենք ռուսական ռմբակոծիչը կործանելիս չեն իմացել, թե որ երկրին է պատկանում այն, և եթե իմանային, ապա կվարվեին այլ կերպ։
