«Նոր Հայաստան» միավորումը երեկ՝ դեկտեմբերի 1-ին, Երևանում՝ Ազատության հրապարակում, հայտարարել է շուրջօրյա նստացույցի մեկնարկի մասին՝ սկսելով իր հայտարարած քաղաքացիական անհնազանդության շարժումը, որի կարճաժամկետ նպատակ է հայտարարված դեկտեմբերի 6-ին կայանալիք սահմանադրական հանրաքվեի կասեցումը, իսկ գլխավոր նպատակ է հայտարարված իշխանափոխությունը և նոր ընտրությունների անցկացումը: «Նոր Հայաստանի» նախաձեռնողները հայտարարել են, որ չեն հեռանալու, մինչև իրենց նպատակներին հասնելը:
Հանրահավաքից բացի, երեկ անցկացվել է նաև երթ, որը ՀՀԿ-ի գրասենյակի մոտով է անցել, որտեղ արձանագրվել է որոշակի լարվածություն ոստիկանության հետ: Ոստիկանությունն ավելի ուշ հայտարարություն տարածեց, որով դիմում էր «Նոր Հայաստանի» առաջնորդներին, մասնավորապես Րաֆֆի Հովհաննիսյանին և Ժիրայր Սեֆիլյանին՝ կոչ անելով չանել սադրիչ քայլեր, այլապես լարվածության և հետագա հետևանքների պատասխանատվությունը կընկնի նրանց վրա: Ի պատասխան՝ Րաֆֆի Հովհաննիսյանը Ազատության հրապարակի հարթակից ոստիկանությանը կոչ արեց չանել նման հայտարարություններ և հետևել ու ծառայել օրենքին՝ չխոչընդոտելով քաղաքացիների անհնազանդության իրավունքի խաղաղ իրացմանը: Երեկ, իհարկե, հրապարակում հնչել են նաև արմատական կոչեր, մինչև անգամ հայտարարություններ այն մասին, որ պատրաստ են անգամ արյան գնով հասնել իշխանափոխության, եթե իշխանությունը որոշի կրակել:
Այսպիսով, դեկտեմբերի 1-ին մեկնարկել է հայտարարված անհնազանդության շարժումը, և այս մեկնարկն, ըստ էության, կարելի է բնորոշել, այսպես ասած, սպասվածի սահմաններում: Այսինքն՝ ըստ էության սպասելի էր օրվա ողջ ընթացքը՝ սկսյալ առավոտյան ընդդիմադիր ուժի տարածած հայտարարություններից, որ խոչընդոտվում է մարզերից քաղաքացիների միացումը հանրահավաքին:
Ըստ էության սպասելիի շրջանակում էր նաև հանրահավաքի մասնակիցների քանակը, որը սկզբում և երթի ընթացքում բավականին շատ էր, երթից հետո սակայն կտրուկ նվազեց, ընդհանուր առմամբ տպավորիչ չէր, թեև նախաձեռնողները ի սկզբանե հայտարարել էին, որ երկարատև պրոցեսի են պատրաստվում, և եթե հանրահավաքի մասնակից բազմության քանակը չլինի այնքան, որ իշխանություններին պահանջներ ներկայացնելու ներուժ պարունակի, ապա իրենք կաշխատեն քանակը, բազմությունը ավելացնելու ուղղությամբ:
Ըստ էության, «Նոր Հայաստանի» անհնազանդության շարժման առաջին օրը եթե հիանալի մեկնարկ չէր, ապա ակնհայտորեն նաև տապալում չէր, պետք է արձանագրել, որ ոստիկանության հետ լարված բախումն, ըստ էության, երևի թե փոխադարձ «հետախուզություն» էր, իշխանությունն ու «Նոր Հայաստանը» փորձեցին միմյանց թույլ կամ ուժեղ կողմերը շոշափել, իհարկե՝ առաջին հերթին հոգեբանական: Եվ այս իմաստով, իհարկե, նկատելի է, որ կողմերը որոշակիորեն ընդունեցին տևական պայքարի մարտավարությունը, համենայնդեպս առաջին օրը վկայեց, որ երկուստեք դիրքավորումը գնում է հենց դրան:
«Նոր Հայաստանն» այսօր շարունակելու է իր ակցիաները Ազատության հրապարակում, և այս իմաստով, իհարկե, երկրորդ օրն անկասած լինելու է շատ ավելի խոսուն՝ այն իմաստով, որ այս օրվա դինամիկան, իհարկե, բացարձակապես ոչ վերջնական կամ ամբողջական, սակայն ի տարբերություն մեկնարկի առաջին օրվա, այսօրը, ըստ էության, առավել խորքային գնահատականի և եզրահանգումների տեղիք կտա ծավալված շարժման հետագա ընթացքի և քաղաքական ազդեցության տեսանկյունից:
