Մանկահասակ աֆրիկացի աղջիկների թիվը, ովքեր բռնությամբ կնության են տրվում, 2050 թվականին կարող է կրկնապատկվել և հասնել 310 միլիոնի։ Նման տեղեկություն է պարունակում Աֆրիկայում երեխաների ամուսնությունների հարցին նվիրված ՅՈՒՆԻՍԵՖ-ի զեկույցը։
«Նման դեպքերի մասին տեղեկատվության տարածումն ու համատեղ ջանքերը թույլ կտան արմատախիլ անել նման ամուսնությունների կործանարար հետևանքները»,- ասել է Աֆրիկյան միության հանձնաժողովի նախագահ Կնոսազանա Դլամինի-Զուման։
Զեկույցի հեղինակների տվյալներով՝ 2050 թվականին Աֆրիկան առաջ կանցնի Հարավային Ասիայից 20-24 տարեկան աղջիկների թվով, ովքեր հարկադրաբար ամուսնացել են մանուկ հասակում։ Փորձագետները նշում են, որ երբ երեխաներն ամուսնանում են, նրանց առողջ և լիարժեք կյանքի շանսերն արմատապես նվազում են։
ՅՈՒՆԻՍԵՖ-ն ընդգծում է, որ վաղ ամուսնությունների թվի աճի տեմպերը դանդաղել են, սակայն դա բավարար չէ։ Եթե դրանք շարունակեն կրճատվել ընթացիկ մակարդակով, ապա 2050 թվականին միևնույն է՝ մանկահասակ աֆրիկուհիների թիվը, ովքեր հարկադրաբար ամուսնացել են, կհասնի 310 միլիոնի։