Նոյեմբերի 9-10-ը Երևանում կայանալիք «Արդար դատաքննություն և դատական իրավունքի անկախություն» թեմայով ԵՄ-Հայաստան հասարակական կազմակերպությունների համաժողովին մասնակցելու է նաև Հելսինկյան քաղաքացիական ասամբլեայի հայկական կոմիտեի համանախագահ Նատալյա Մարտիրոսյանը: Նա նշեց, որ ինքը պաշտոնական հրավեր չի ստացել, սակայն համապատասխան նամակով ԵՄ ներկայացուցչություն դիմելուց հետո մասնակցության թույլտվություն է ստացել: Տիկին Մարտիրոսյանը նշեց, որ փորձելու է բարձրացնել այն հարցերը, որոնք առնչվում են Հայաստանում մարդու իրավունքների վիճակին. «Սովորաբար նման հավաքների ժամանակ հաստատված օրակարգը կա, սակայն լինելու են խմբային քննարկումներ, որոնց ժամանակ հնարավորություն կա բարձրաձայնելու մեր կարևորած խնդիրները: Նախևառաջ պետք է խոսենք քաղբանտարկյալների առկայության, խոսքի ազատության, հավաքների անցկացման ազատության մասին»:
Տիկին Մարտիրոսյանի կարծիքով, համաժողովը կարևոր է, և այն պետք է օգտագործել. «Եթե մտածենք, որ ոչ մի բան արդյունք չի բերի, ապա պետք է ձեռքներս ծալենք ու նստենք: Ես կարծում եմ, որ ցանկացած ամբիոն պետք է օգտագործել՝ բարձրաձայնելու Հայաստանում առկա խնդիրները, եթե նույնիսկ մեկ օրվա մեջ այդ հարցերը չլուծվեն: Այս տեսանկյունից կարևոր հավաք է, երկու օր պետք է աշխատենք, տեսնենք` արդյունքները ինչպիսի՞ն կլինեն»:
