Երևանի Վ. Բրյուսովի անվան պետական լեզվաբանական համալսարանի նախկին ռեկտոր Սուրեն Զոլյանը, ով մարտի 15-ին ելույթ է ունեցել Ազատության հրապարակում, իսկ մարտի 17-ին ԱԱԾ ներկայանալու հեռախոսազանգ է ստացել, մարտի 25-ին ներկայացել է ԱԱԾ` Երևանի Վ. Բրյուսովի անվան պետական լեզվաբանական համալսարան ՊՈԱԿ-ի վերաբերյալ նյութերի պատրաստման անհրաժեշտությունից ելնելով:
Սուրեն Զոլյանը պատմեց, որ հունվարի 13-ից մինչև հունվարի 23-ը ԿԳ նախարարությունը Վ. Բրյուսովի անվան լեզվաբանական համալսարանում իրականացրել է ներքին աուդիտ և ինչ-ինչ խախտումներ է հայտնաբերել, ինչի մասին նյութեր է ուղարկել ԱԱԾ, որն էլ զբաղվում է այդ գործով:
«ԱԱԾ-ն հանդես է գալիս որպես Արմեն Աշոտյանի ծառայություն»,- ասաց Սուրեն Զոլյանը` հավելելով, որ սա աբսուրդի թատրոն է հիշեցնում:
Նա հիշեցրեց, որ դեռ հունիս ամսից զանազան ստուգումներ էին կատարվում` հայտնաբերելու, թե ինչ կոպիտ խախտումներ է ինքն արել: Խոսքը երկու գնումների մասին է. համալսարանը գնել է արվեստի գործեր, որոնք, ըստ Սուրեն Զոլյանի, համարվել են բարձր գնահատված: Սուրեն Զոլյանն ասաց, որ Լեզվաբանական համալսարանի տարեկան բյուջեն եղել է երկու միլիարդ դրամ:
Գնվել են երկու արվեստագետների աշխատանքներ, որոնցից մեկի անունը նա չհայտնեց՝ նշելով, որ մյուս արվեստագետը իր քույրն է` Նարինե Զոլյանը, ում ցուցահանդեսը 2011-ին բացվել է ՆՓԱԿ-ում, իսկ ցուցահանդեսի ավարտից հետո գնել են երեք նկար և քսան գրաֆիկական գործ. «Ամբողջը եղել է մեկ միլիոն երկու հարյուր հիսուն հազար դրամ, որը նրանց մասնագետի կողմից գնահատվել է հինգ հարյուր հազար»,- ասաց Սուրեն Զոլյանը: Նրա խոսքով՝ կտավները, սակայն, իրական արժեքից շատ ավելի էժան են ձեռք բերվել:
«Ենթադրենք, իսկապես խախտում է տեղի ունեցել: Նախարարությունը կազմակերպել է ստուգում և մեկ միլիոն դրամի վնաս արձանագրել: Այս դեպքում նախարարությունը բուհին առաջարկում է մեղավորներից վնասի հատուցում պահանջել: Եթե մեղավորները չեն համաձայնվում, պետք է դիմել դատարան: Մեկ միլիոնը այնքան մեծ գումար չէ, որ վտանգում է Հայաստանի ազգային անվտանգությունը, և ինչի համար գործը ուղարկում են ԱԱԾ»,- հավելեց Սուրեն Զոլյանը:
«Իբր համալսարանի գլխավոր հաշվապահը դեմ է եղել այդ գնումներին: Ես այդ ժամանակ քաղաքում չէի, հաշվապահը իր դեմ լինելու մասին ասել է պրոռեկտորին, որը ինձ զանգահարել է, և ես ասել եմ` չէ, անօրինական գործարք կատարեք: Հաշվապահը ինքը պարտավոր է չկատարել վերադասի անօրինական պահանջը»,- ասաց Սուրեն Զոլյանը` հավելելով, որ ինքը քայլեր կձեռնարկի՝ պատասխանատվության ենթարկելու հաշվապահին սուտ մատնություն տարածելու համար:
Սա, Սուրեն Զոլյանի խոսքով, աբսուրդ է, որն ապացուցում է՝ գործն իրոք պատվեր է: Նա նշեց, որ իրենից դեռ միայն վերցրել են բացատրություն, մեղադրանք առայժմ ներկայացված չէ:
Ներկա քաղաքական իրավիճակին անդրադառնալով` Սուրեն Զոլյանը նշեց, որ Սերժ Սարգսյան-Րաֆֆի Հովհաննիսյան նամակագրությունը քաղաքավարության ժեստեր են, որը ցույց է տալիս բանակցության կամք, բայց ըստ իրեն՝ հիմնական հարցը, որի շուրջ կարելի է բանակցել, ճշմարտության հանձնաժողովներ ստեղծելն է, որոնք կապացուցեն` ինչ է տեղի ունեցել ընտրությունների օրը:
Նրա խոսքով՝ շատ կարևոր է անցկացնել խորհրդարանական նոր ընտրություններ: Նա նշեց, որ հարցը ոչ թե պաշտոններն են, ինչը հաճախ քննարկվում է, այլ նոր ընտրությունները:
Լուսանկարը՝ PanARMENIAN Photo-ի
