Ռուսական TASS լրատվական գործակալության փոխանցմամբ՝ «Գազպրոմը» բաժնետիրական համաձայնագիր է ստորագրել «Հյուսիսային հոսք 2» գազատարի նախագծի շուրջ։ Այդ մասին նշված է ռուսական ընկերության մամլո հաղորդագրությունում։
«Գազպրոմը» և E.ON-ը Վլադիվոստոկում անցկացվող Արևելյան տնտեսական ֆորումի շրջանակներում քննարկել են էներգետիկ ոլորտում համագործակցության ընթացիկ հարցերն ու հետագա զարգացման հեռանկարները։
Հատուկ ուշադրություն է հատկացվել Գերմանիայում և ընդհանրապես Եվրոպայում ռուսական գազի սպառողների մատակարարումների արդյունավետության բարձրացմանը։ Մասնավորապես, քննարկվել է «Հյուսիսային հոսք» գազատարի նախագծի հաջող իրագործման հարցը։
«Գազպրոմի» ղեկավար Ալեքսեյ Միլլերն ու E.ON-ի կառավարման անդամ Կլաուս Շեֆերն ընդգծել են «Հյուսիսային հոսք 2» գազատարի ստեղծման այժմեականության հարցը։ Ավելի վաղ «Գազպրոմը» հայտարարել էր, որ «Հյուսիսային հոսք 2» նախագիծն ունի ռազմավարական կարևորություն գազամատակարարման հուսալիության բարձրացման հարցում։