Ադրբեջանական Turan լրատվական գործակալության փոխանցմամբ՝ ԱՄՆ պետդեպարտամենտը երեկ հայտարարություն է տարածել Ադրբեջանում լրագրողուհի Խադիջա Իսմայլովային 7.5 տարով ազատազրկման դատապարտելու որոշման կապակցությամբ:
«ԱՄՆ-ը խորապես մտահոգված է լրագրողուհի Խադիջա Իսմայլովայի հանդեպ ադրբեջանական դատարանի այսօրվա որոշման կապակցությամբ։ Մենք նաև մտահոգված ենք քննության ու դատավարության ընթացքում խախտումների մասին հաղորդումների առնչությամբ։
Այս դեպքը դարձավ ևս մեկ օրինակ այն բանի, որ Ադրբեջանում լայն միտում ունի մարդու իրավունքների, այդ թվում նաև՝ մամուլի ազատության սահմանափակումը։
Ինչպես ոչ վաղ անցյալում հայտարարել է Ադրբեջանի նախագահ Իլհամ Ալիևը, ԶԼՄ-ների ազատությունը ժողովրդավարական սկզբունքների անքակտելի մասն է, և դրա խախտումը հակասում է Ադրբեջանի շահերին։
Մենք Ադրբեջանի կառավարությանը կոչ ենք անում ազատ արձակել տիկին Իսմայլովային ու իրենց հիմնարար ազատությունները կյանքի կոչելու համար ազատազրկված մյուս բանտարկյալներին։ Մենք Ադրբեջանի կառավարությանը նաև կոչ ենք անում հավատարիմ մնալ իր միջազգային պարտավորություններին, որոնք առնչվում են սեփական քաղաքացիների հիմնական ազատությունների ու մարդու իրավունքների պաշտպանությանը»,- ասված է հայտարարության մեջ։