Մեծ Բրիտանիայում օտարեկրացիների կողմից անօրինաբար յուրացված կամ լվացված փողերով տներ գնելու պրակտիկան անհրաժեշտ է դադարեցնել: BBC-ի ռուսական ծառայության հաղորդմամբ՝ այս մասին հայտարարել է Մեծ Բրիտանիայի վարչապետ Դևիդ Քեմերոնը:
Նա խոստացել է բացահայտել Բրիտանիայում էլիտար անշարժ գույքի գնման համար «անանուն ֆիկտիվ ընկերությունների» օգտագործումը:
Սինգապուրում ելույթի ժամանակ ան ասել է, որ մեծ Բրիտանիան չպետք է դառնա «ամբողջ աշխարհից հանցավոր ճանապարհով ստացված դրամական միջոցների ապաստարան»:
Նրա խոսքով՝ միջազգային հանրությունը պետք է էներգետիկ կերպով պայքարի «կոռուպցիայի քաղցկեղային ուռուցքի» դեմ:
Քեմերոնը քառօրյա շրջագայություն է իրականացնում Հարավարևելյան Ասիայի երկրներով: Երկուշաբթի նա հայտարարել է, որ Մեծ Բրիտանիան և Ինդոնեզիան համաձայնեցրել են ԴԱԻՇ-ի (Իրաքի և Շամի իսլամական պետություն) ընդհանուր թշնամու դեմ պայքարի միջոցները:
Ուղևորության շրջանակներում նա կայցելի նաև Մալայզիա և Վիետնամ:
Իր խոսքում Քեմերոնը կոռուպցիան անվանել է «առաջընթացի թշնամի», նաև դրա դեմ պայքարի միասնական ջանքերի կոչ է արել:
One ոչ կոմերցիոն կազմակերպության 2014 թ. զեկույցի համաձայն՝ մոտ 1 տրլն դոլար կոռուպցիայի հետևանքով դուրս է բերվել աղքատ երկրներից: Կազմակերպությունը նաև խոսել է ֆիկտիվ կազմակերպությունների և փողերի լվացման մասին:
Իր խոսքում Քեմերոնն ասել է, որ անշարժ գույքը Բրիտանիայում, հատկապես Լոնդոնում, «գնվում է արտասահմանցիների կողմից անանուն ֆիկտիվ ընկերությունների միջոցով, երբեմն անօրինականորեն ձեռք բերված կամ լվացված դրամական միջոցների օգտագործմամբ»:
Ֆիկտիվ ընկերությունները կոմերցիոն գործունեություն չեն ծավալում, ծառայում են առաջին հերթին իրենց սեփականատերերին ծածկելուն:
«Կեղտոտ փողերը Բրիտանիայում տեղ չունեն: Իրականում կեղտոտ փողերը ոչ մի տեղ չպետք է տեղ ունենան»,- հավելել է Քեմերոնը: