ISIS-ը՝ ԴԱԻՇ-ը (Իրաքի և Շամի իսլամական պետություն), վտանգ չի ներկայացնում Հայաստանի համար:«Արևելք» պարբերականում այսօր նման կարծիք է հայտնել քաղաքագետ, ամերիկյան «Բըրքլի» համալսարանի քաղաքագիտության դասախոս Ասպետ Քոչիկյանը:
Նա, անդրադառնալով Թուրքիայի կողմից անցած օրերին սանձազերծված ռազմական գործողություններին, ասել է. «Թուրքիայի սկսած հարձակումները ISIS-ի և PKK-ի դեմ մի քանի դրդապատճառ ունեն, և այդ պատճառներից հիմնականը Սուրուչում տեղի ունեցած պայթյունն էր: Այդ պայթյունը Թուրքիայի հասարակական կարծիքը մղեց հանդես գալու ISIS-ի դեմ: Դրանից հետո է, որ թուրքական ուժերը սկսեցին ռազմական գործողություններ ձեռնարկել»:
Քաղաքագետը կարծիք է հայտնում, որ տեղին է նշել, որ հակառակ ԱՄՆ կողմից Թուրքիային արված զգուշացման՝ հեռու մնալ PKK-ի դիրքերին հարվածելուց, «թուրքական իշխանությունները անտեսեցին դա և միաժամանակ հարվածեցին ISIS-ի և PKK-ի դիրքերին»:
Պատասխանելով պարբերականի հարցմանը, թե ի՞նչ քաղաքական հետևանքներ կարող են ունենալ այս դեպքերը Թուրքիայի քաղաքական կյանքի վրա՝ Քոչիկյանն ասել է. «Վերջին ընտրություններին, ինչպես գիտեք, իշխող AKP կուսակցությանը չհաջողվեց բացարձակ մեծամասնություն կազմել, և ենթադրություններ կան, որ այս գործողությունները շահարկվում են իշխանության կողմից՝ առաջիկա արտահերթ ընտրություններում խորհրդարանում իրենց դիրքերը ամրապնդելու համար: Կարճ ասած՝ AKP-ն պիտի փորձի ամեն գնով օգտագործել այս գործողությունները երկրում իր վարկը բարձրացնելու համար»:
Խոսելով ISIS-ի՝ Հայաստանի հանդեպ սպառնալիք լինելու մասին՝ Քոչիկյանն ասել է. «ISIS ահաբեկչական խմբավորումը սպառնում է ոչ միայն Հայաստանին, այլև ամբողջ աշխարհին, բայց այս հանգրվանում այն Հայաստանի հանդեպ ուղղակի սպառնալիք չէ այն պարզ պատճառով, որ կարողություններ չունի: Իմ կարծիքով՝ ներկայումս ISIS-ի թիրախներն են Իրաքը, Սիրիան, Լիբանանն ու Թուրքիան, և այն շատ հեռու է Հայաստանին վտանգ ներկայացնելուց»:
Քաղաքագետը, խոսելով պոլսահայության մասին, նույնպես նկատել է, որ պոլսահայ համայնքը, որպես միավոր կամ համայնք, ISIS-ի համար ուղղակի թիրախ չէ, սակայն պոլսահայությունը կարող է վնասներ կրել, եթէ ISIS-ը Պոլսում ահաբեկչական գործողություններ իրականացնի»: