Իտալական Hacking Team գործակալությունը, որը զբաղվում է համացանցում մարդկանց հետևելու ծրագրեր մշակելով, (հատուկ գործակալությունների շրջանում հայտնի Da Vinci ծրագրային փաթեթ) հակերային հարձակման է ենթարկվել: Այդ մասին հայտնում է Gizmodo-ն:
Չարագործները 400 գբ փաստաթղթերի հետ միասին կարողացել են մուտք գործել նաև գործակալության Twitter-յան էջը: Հենց էջի միջոցով էլ նրանք որոշ հրապարակումներ են արել՝ դրանով իսկ տեղեկացնելով կայքը կոտրելու փաստի մասին:
Գործակալության այցելուների կազմում նշվում են 36 երկրներ, որոնց թվում՝ Ադրբեջանը, Ղազախստանը, Ուզբեկստանը և Ռուսաստանը:
Գործի առնչությամբ հետաքննություն է սկսվել: Խնդիրն այն է, որ գործակալությունը շատ հակառակորդներ ունի, որոնցից մեկը «Լրագրողներ առանց սահմանի» կազմակերպությունն է:
Da Vinci ծրագրային փաթեթը համարվում է լրտեսական ամենահզոր ծրագրերից մեկը: Այն կարողանում է հետևել մարդկանց ոչ միայն ցանցերում, այլև գաղտնալսել հեռախոսային խոսակցություններ և կարդալ նույնիսկ պաշտպանված տեքստային հաղորդագրություններ:
