Sputnik-Georgia լրատվական գործակալության փոխանցմամբ՝ Վրաստանի արդարադատության նախարարությունը ՄԻԵԴ-ի որոշման հիման վրա Ռուսաստանից պահանջում է 70.320.000 եվրո փոխհատուցում՝ 2006 թվականին երկրից վրացիների զանգվածային արտաքսման համար:
Այդ մասին նշված է Վրաստանի արդարադատության նախարարության տարածած հայտարարությունում: Դրա համաձայն՝ Վրաստանի արդարադատության նախարարությունը 2015 թվականի հուլիսի 2-ին ՄԻԵԴ-ին ներկայացրել է փաստաթուղթ, որում արտացոլված է Վրաստանի դիրքորոշումը 2006 թվականի աշնանը Ռուսաստանից վրացիների զանգվածային վտարման հանդեպ:
Վրաստանի արդարադատության նախարարությունը պահանջում է վերականգնել արդարությունը, իսկ Ռուսաստանից պահանջում է պատճառած բարոյական վնասի համար ավելի քան 70.3 միլիոն եվրո փոխհատուցում: Վրաստանի արդարադատության նախարարությունն ընդգծել է, որ այդ գումարը հենված է նմանատիպ գործերի դեպքում ՄԻԵԴ-ի նախադեպային որոշումների վրա:
Ընդգծվում է, որ ընդհանուր առմամբ Ռուսաստանը 2006 թվականի աշնանը երկրից վտարել է 4364 վրացու: