«Սա Ռուսաստանին ամեն ինչ տալու քաղաքականության շարունակությունն է: Ռուսները փորձում են ամեն ինչ անել, որ օտարները Հայաստան մուտք գործեն միայն իրենց թույլտվությամբ կամ չգործեն: Այսինքն` շուկան ամբողջությամբ տրված է Ռուսներին»,-«Առաջին լրատվական»-ի հետ զրույցում ասաց քաղավիացիայի վարչության նախկին պետ Շահեն Պետրոսյանը՝ անդրադառնալով Etihad ավիաընկերության հայաստանյան ծառայության դադարի մասին:
Նշենք, որ Արաբական միացյալ էմիրությունների ազգային ավիափոխադրող Etihad ավիաընկերությունը հայտարարել է չվացուցակի վերանայման պատճառով Հայաստանում իր ծառայությունը դադարեցնելու մասին:
Etihad ավիաընկերությունն անցած տարվա հուլիսի երկուսից շաբաթական չորս չվերթ էր իրականացնում Աբու-Դաբի – Երևան ուղղությունով: Այս ուղղությունը Հայաստան-ԱՄՆ տարանցիկ ամենաէժան տարբերակն էր: Իսկ մինչ Etihad-ի մուտքը, դեպի ԱՄՆ կամ ԱՄՆ-ից Հայաստան տարանցիկ ամենաէժան ճանապարհը Մոսկվան էր:
Շահեն Պետրոսյանը մեզ հետ զրույցում չբացառեց նաև զուտ բիզնեսնպատակներից, բիզնեսի եկամտաբերությունից դրդված չվերթերի դադարեցումը, սակայն, նրա խոսքով առավել հիմնավոր կասկածներ ունի, որ Ռուսական ավիաընկերությունների մատն է խառը այս գործընթացին: «Սա ավելի շուտ Եվրասիական տնտեսական միության անդամակցման հետևանքն է: Բոլորն արհամարհում են Հայաստանը: Դա է խնդիրը»,-նկատեց Պետրոսյանը: Նրա խոսքով Etihad-ի, Չեխական ավիաուղիների և մի քանի այլ դեպքեր վառ ապացույցն են այն բանի, որ «բաց երկնքի քաղաքականություն» կոչվածը հորինված, սուտ գործընթաց էր: Հայաստանը պետք է ունենա ազգային փոխադրող: «Ենթադրենք` բոլորը հրաժարվեն Հայաստանյան չվերթերից, մեր ուղևորները ի՞նչ են անելու: Ինչ որ ֆորսմաժորային իրավիճակ ստեղծվի՝ երկրաշարժ լինի, պատերազմական իրավիճակ լինի, կամ Ռուսաստանի նկատմամբ կիրառված սանկցիաները մեր նկատմամբ կիրառվեն, մենք ի՞նչ ենք անելու»,-զարմացած հարցնում է ավիացիայի նախկին պետը:
Հարցին, թե իր կարծիքով ինչու է կառավարությունը, իշխանությունը հապաղում այդ հարցում, մեր զրուցակիցը նկատեց.«Այս կառավարությունը գոյատևումէ միայն սեփական վայելքի համար: Իրենք ոչ մի հարց չեն լուծում: գազի, էլէկտրաէներգիայի պատմությունը, բոլոր ոլորտներում նույն վիճակն է: Ամեն ինչ տրված է ռուսներին, իսկ կառավարությունը ոչինչ չի անում, միայն տասնյակ նախարարություն է բացել ու մեր փողերով աշխատավարձ է վճարում նրանց: Նրանք երկիրը թալանելու համար են, ոչ թե ի նպաստ ժողովրդի, ի նպաստ երկրի որևէ գործ անելու համար»,-եզրափակեց Շահեն Պետրոսյանը: