«Օրենքի կիրարկման ժամկետը երկարացնելով՝ ինձ թվում է, որ որևէ հարց չեն լուծում: Եվ այն նպատակը, որ դրված էր զինծառայությունից ազատելու մասին օրենքի հիմքում, չլուծվեց: 2004 թ. ունեինք 11 հազար հետախուզվող, հիմա՝ 9918: Այս օրենքով, ճիշտ է, որոշակի դրամական մուտքեր ենք ապահովում. 3 տարվա կտրվածքով ակնկալվում է մոտ 200 մլն դրամ: Բայց այն բացը, որ ունենում ենք զորակոչային ռեսուրսի դեպքում, որը ՊՆ-ն փորձում է ծածկել պայմանագրային ռեսուրսներով, դրան ուղղված ծախսը մի քանի անգամ ավելի մեծ է»,- լրագրողների հետ զրույցում ասաց ԱԺ ՀԱԿ խմբակցության անդամ Գագիկ Ջհանգիրյանը՝ անդրադառնալով «Սահմանված կարգի խախտմամբ պարտադիր զինվորական ծառայություն չանցած քաղաքացիների մասին» ՀՀ օրենքում փոփոխություն կատարելու մասին կառավարության ներկայացրած նախագծին:
Այդ նախագծով կառավարությունն առաջարկում է ևս 3 տարով հետաձգել այդ օրենքի կիրառությունը, որ բանակային ծառայությունից խուսափած երիտասարդներին հնարավորություն է տալիս յուրաքանչյուր զինակոչային ժամկետի համար վճարել 200.000 դրամ և ազատվել պատասխանատվությունից:
Ըստ Գ. Ջհանգիրյանի՝ այս օրենքով ՀՀ իշխանությունները ևս մեկ անգամ նպաստում են, որ Հայաստանի քաղաքացիները չվերադառնան Հայաստան, չծառայեն մեր բանակում կամ էլ 27 տարին լրանալուց հետո կատարեն համապատասխան վճարումներն ու անարգել հատեն մեր երկրի սահմանը: «Եթե ուսումնասիրենք արտագաղթի տեմպերը, ապա կտեսնենք, որ զորակոչային տարիքի արտագաղթն աճել է»,- ավելացրեց պատգամավորը: