«Համերգով աշխարհին ասում ենք, որ Հայոց ցեղասպանությունը չի մոռացվել. «Հիշում ենք և պահանջում», ես ծանոթ եմ Ցեղասպանության վերաբերյալ փաստերին, պատմություններին դեռ մանկուց»,- «Առաջին լրատվականի» հետ զրույցում ասաց Համաշխարհային «24/04» նվագախմբի ՝ «Վերածնունդ» խորագիրը կրող համերգի առաջին ջութակ, մենակատար Ալեխանդրո Դրագոն: Ալեխանդրո Դրագոն ներկայացնում է Արգենտինան, այժմ բնակվում է ԱՄՆ-ում: Երաժիշտը պատմեց, որ Բուենոս Այրեսի հայկական թաղամասերից մեկում է մանկության տարիներն անցկացրել , ուստի, թե հայոց պատմությանը, թե հայ կոմպոզիտորներին ճանաչում է դեռ մանկուց, հայկական ստեղծագործությունները նրան հարազատ են: Ինչ վերաբերում է հայ դասականներին, կոմպոզիտորներին, ապա նրանք համաշխարհային արժեքներ են ներկայացնում:
Սերբիայից առաջին ջութակ, մենակատար Միլանա Բյելոբաբան «Առաջին լրատվականին» ասաց, որ դատապարտում է Հայոց ցեղասպանությունը, այն համարում է սարսափելի ոճրագործություն. «Այս համերգը շատ գեղեցիկ միջոցառում է զոհվածների հիշատակին հարգանքի տուրք մատուցելու համար: Սա ամենալավ տարբերակն է հարգել Ցեղասպանության զոհերի հիշատակը: Առաջին անգամ եմ նվագում այստեղ, շատ գեղեցիկ է: Երևանն իսկապես գեղեցիկ քաղաք է, շատ էի լսել Երևանի մասին, բայց չէի կարծում, թե այստեղ ինձ կզգամ ինչպես տանը»,- շեշտեց նա:
Մանրամասները՝ տեսանյութում
