Վրաստանը, Ադրբեջանն ու Թուրքիան երեկ Թբիլիսիում ռազմական համագործակցության մասին եռակողմ համաձայնագիր են ստորագրել:
Ադրբեջանի պաշտպանության նախարար Զաքիր Հասանովը հայտարարել է, որ եռակողմ համաձայնագիրը կհստակեցնի երեք երկրների միջև ծավալված համագործակցության հիմնական ուղիները:
Երեք երկրների միջև ռազմական համագործակցության սկիզբը դրվել է դեռ անցած տարվա օգոստոսին՝ Նախիջևանում տեղի ունեցած համաժողովի ընթացքում: Այն ժամանակ Վրաստանի պաշտպանության նախկին նախարար Իրակլի Ալասանիան խոստովանել էր, թե եռակողմ ձևաչափով նման հանդիպումներ անցկացնելու գաղափարը հենց վրացական կողմին է պատկանում: Միևնույն ժամանակ Ալասանիան հատուկ ընդգծել էր, որ որ Թուրքիայի,Վրաստանի և Ադրբեջանի միջև ռազմական ոլորտում ծավալված համագործակցությունն ուղղված չէ որևէ երրորդ երկրի դեմ:
Նման տեսակետ «Առաջին լրատվական»-ի հետ զրույցում այսօր հայտնեց նաև վրացի հայտնի քաղաքագետ, «GIPA» համալսարանի միջազգային հարաբերությունների մագիստրատուրայի ղեկավար, պրոֆեսոր Թոռնիկե Շարաշենիձեն ասաց, որ ցանկացած դեպքում Վրաստանը Հայաստանի դեմ երբեք ռազմական գործողություններ չի կատարի․ «Մեզ համար էլ խնդիր է Գյումրիում տեղակայված ռուսական ռազմաբազան, և հետո եթե Հայաստանն անհանգստանում է, այդ ռազմաբազան իրեն կպաշտպանի»,- ասաց նա:
Շարունակելով իր միտքը՝ քաղաքագետն ընդգծեց, որ կոնկրետ Վրաստանի տարածքից Հայաստանի նկատմամբ երբեք ագրեսիա լինել չի կարող, և ռազմական ոլորտում այս համագործակցությունն ուղղված չէ Հայաստանի դեմ:
Նրանից հետաքրքրվեցինք նաև, թե եթե ոչ առանձին, ապա Թուրքիայի և Ադրբեջանի հետ համատեղ Վրաստանը կներգրավվի՞ Հայաստանի դեմ նախաձեռնած գործողություններին․ «Անկեղծ ասած՝ այդ համաձայնության տեքստին դեռևս ծանոթ չենք, բայց, ամենայն հավանականությամբ, չի մասնակցի»,- ասաց քաղաքագետը:
