Պետդումայի մշակույթի հարցերով հանձնաժողովի նախագահ, ռեժիսոր Ստանիսլավ Գովորուխինն աշնանը վարձույթ կհանձնի Սերգեյ Դովլաթովի ստեղծագործությունների հիման վրա ստեղծված իր` «Հրաշալի դարաշրջանի ավարտը» ֆիլմը: Այս մասին հայտնում է TASS-ը:
«Ծրագրում ենք ֆիլմը թողարկել աշնանը: Աշխատանքը ես արդեն ավարտել եմ»,- լրագրողներին հայտնել է ռեժիսորը:
Գովորուխինը ֆիլմի նկարահանումները սկսել է 2014 թ. ամռանը: Ֆիլմի հիմքում Դովլաթովի «Փոխզիջում» նովելների հավաքածուն է: «Բայց այլ ստեղծագործություններից ևս քիչ-քիչ կա,- նշել է ռեժիսորը:- Գործող անձանցից մեկը կլինի Դովլաթովին շատ նման լրագրող»:
Սյուժեի կենտրոնում Անդրեյ Լենտուլովի պատմությունն է, որին դատողությունների շիտակության համար ստիպում են Լենինգրադից Տալլին տեղափոխվել, այնտեղ նա աշխատանքի է տեղավորվում տեղական թերթում:
Գլխավոր դերերը կատարում են Իվան Կոլեսնիկովը, Սերգեյ Գարմաշը, Ֆյոդոր Դոբրոնրավովը, Դմիտրի Աստրախանը:
