ԱՄՆ-ում մոտ 150 դեռահաս հեծանվորդներ հավաքվել էին Glendale Sports Complex-ի մոտ՝ մասնակցելու երկրորդ ամենամյա Bike-A-Thon/Hike-A-Thon բարեգործական արշավին, որն անցկացնում է Bikes 4 Orphans կազմակերպությունը։ Վերջինս նպատակ ունի հեծանիվներ նվիրաբերել աշխարհի որբերին՝ հույսով, որ այն կհեշտացնի նրանց հասանելիությունը կրթությանն ու այլ անհրաժեշտությունների։ Այս մասին հայտնում է Glendale News Press-ը։
Կազմակերպությունը ծնունդ է առել 2012 թվականին, երբ եղբայրներ Սեպուհ և Շանթ Բազիկյաններն իմացան Քենիայում որոշ որբերի տեղաշարժման դժվարությունների մասին։
Սեպուհ Բազիկյանը, ով այն ժամանակ սովորում էր Սուրբ Ֆրենսիսի ավագ դպրոցում, բացեց դրամահավաքի բլոգ։
Շաբաթ օրը կայացած բարեգործական արշավի շրջանակում միավորվել էին Սուրբ Ֆրենսիսի, Քրեսենթա Վելիի և Քլարկ Մագնիտի ավագ դպրոցների դեռահաս հեծանվորդները։
Միջոցառման ժամանակ Գլենդելի քաղաքապետ Զարեհ Սինանյանը գովել է այդ տարիքում նման նպատակի համար դեռահասների ցուցաբերած ջանքերը։ Արդյունքում հավաքվել է 5500 դոլար։
Միջոցառումից առաջ կազմակերպությունում ստացված 4850 դոլարը թույլ է տալիս կազմակերպությանը հասնել տարեսկզբին իր առջև դրված նպատակին՝ հուլիսին հավաքելու 10 հազար դոլար։ Կազմակերպության հիմնադրումից ի վեր այն հեծանիվների մատակարարումներ է կազմակերպել Հայաստանի, Քենիայի, ՀԱՀ-ի և Եթովպիայի 174 որբերի համար։