Ռուսաստանի նախագահ Վլադիմիր Պուտինը հեռախոսային բանակցություններ է անցկացրել Ֆրանսիայի նախագահ Ֆրանսուա Օլանդի, Գերմանիայի կանցլեր Անգելա Մերկելի և Ուկրաինայի նախագահ Պյոտր Պորոշենկոյի հետ: Այս մասին գրում է TASS-ը՝ հղում անելով Ելիսեյան պալատի մամլո ծառայության հաղորդագրությանը: Ընդհանուր առմամբ մասնակիցներն առաջընթաց են արձանագրել Ուկրաինայի հարավ-արևելքում ճգնաժամի հաղթահարման հարցում:
««Նորմանդական քառյակի» երկրների առաջնորդները առաջընթաց են արձանագրել Մինսկի պայմանավորվածությունների իրագործման հարցում, սակայն նրանք նաև ընդգծել են իրավիճակը բարելավելու անհրաժեշտությունը»,- ասվում է Ելիսեյան պալատի հայտարարության մեջ:
Հեռախոսազրույցի ընթացքում Ֆրանսիայի, Գերմանիայի և Ուկրաինայի առաջնորդները Պուտինին խնդրել են կալանքից բաց թողնել հացադուլ հայտարարած Նադեժդա Սավչենկոյին:
Զրուցակիցները հանգել են այն հայտարարին, որ անհրաժեշտ է հրադադարի խախտման բոլոր կետերում տեղակայել ԵԱՀԿ դիտորդներ: Բացի այդ, անհրաժեշտություն է համարվել նաև ԵԱՀԿ ամենօրյա հաշվետվության հրապարակումը՝ հրադադարի խախտման վերաբերյալ: Հաշվետվությունը կստանան «նորմանդական քառյակի» երկրների ԱԳՆ-ները:
Քննարկվել է նաև Դոնբասին մարդասիրական օգնություն հատկացնելու հարցը և այդ գործում Միջազգային կարմիր խաչի կոմիտեի դերը։ Շոշափվել են նաև էներգետիկ խնդիրներ: