Ամերիկյան Ֆլորիդա նահանգում կատուն բառացիորեն հառնել է մեռյալներից, հայտնում է ABC-ն: Իր թաղումից մոտ 1 շաբաթ հետո կենդանին վերադարձել է տիրոջ՝ Թամփա քաղաքի բնակիչ Էլլիս Հաթսոնի մոտ, կարծես ոչինչ չէր եղել:
Հաթսոնը կարծել է, որ կենդանին մահացել է, երբ Բարթ անունով կատուն ընկել է ավտոմեքենայի տակ: Երբ տերն իր կատվին տեսել է արյան մեջ, այնքան է ցնցվել ու շփոթվել, որ չի իմացել՝ ինչ անել: Նա հարևանին խնդրել է թաղել իր կատվին, քանի որ ինքը դրա համար ուժ չի ունեցել:
Հարևան Դասթի Օլբրիթթոնի կատուն ևս սատկել է՝ նույնպես մեքենայի տակ ընկնելով: «Ես նրան իմ աչքերով եմ տեսել, և նա մահացած էր, նա փայտացած էր,- նշում է Օլբրիթթոնը:- Հիմա իմ երեխաները մտածում են, որ մեր կատուն էլ տուն կվերադառնա»:
Հարևանները գումար են հավաքում Բարթի բուժման համար: Կատուն ողջ է մնացել, բայց շատ է տուժել: Նրա ծնոտը կոտրվել է, իսկ ձախ աչքը զգալիորեն վնասված է: Կատուն նաև մեկ շաբաթում շատ է սովածացել, ուժասպառ է: Տերն անմիջապես կատվին տարել է անասնաբուժական կլինիկա: Այնտեղ նրան հայտնել են, որ կատվի բուժման համար մի քանի շաբաթ կպահանջվի: Ցավոք, նրա աչքը պահպանել չի հաջողվել: Բարթը պետք է մի շարք վիրաբուժական վիրահատությունների ենթարկվի, և այդ ամենը հազար դոլար կարժենա:
Հաթսոնին ծախսերը հոգալ օգնել է կենդանիների պաշտպանության տեղի միությունը: Տուժած կենդանու լուսանկարները հրապարակել են տեղի ԶԼՄ-ները: