Apple ամերիկյան կորպորացիան հրապարակել է իր եկամուտների մասին եռամսյակային հաշվետվություն, ըստ որի՝ 2015 ֆինանսական տարվա առաջին եռամսյակին, որն ավարտվել է դեկտեմբերի 27-ին, ընկերության շահույթն աճել է 38 տոկոսով՝ հասնելով 18 մլրդ դոլարի, ինչին առաջին հերթին նպաստել է ընդլայնված էկրանով iPhone-ի նոր մոդելների թողարկումը։ Այս մասին հայտնում է Wall Street Journal-ը։
Անցած տարվա նույն ժամանակահատվածում ընկերությունն աշխատել է 13.1 մլրդ դոլար։ Եկամուտն ավելացել է 30 տոկոսով՝ հասնելով 74.6 մլրդ դոլարի։
Ընկերությունը սեպտեմբերի վերջից դեկտեմբերի վերջ վաճառել է ռեկորդային՝ 74.5 մլն սմարթֆոն՝ 46 տոկոսով ավելի, քան մեկ տարի առաջ։ Ընկերության տվյալներով՝ ժամում վաճառվել է մոտ 34 հազար սմարթֆոն։ iPhone-ին է բաժին ընկել ընկերության եկամտի 69 տոկոսը։
Ընկերության եկամուտների վրա ազդել է նաև սմարթֆոնների շարքի թոփ մոդելի թանկացումը։ iPhone 6 Plus-ն արժե 100 դոլարով ավելի, քան անցած տարվա ամենաթանկ մոդելը։
