ԵԱՀԿ Մինսկի խմբի համանախագահները խոստանում են շարունակել բարձր մակարդակով աշխատանքը Հայաստանի և Ադրբեջանի հետ՝ Լեռնային Ղարաբաղի հակամարտության կարգավորման ուղղությամբ: Այս մասին ադրբեջանական Trend գործակալությանն ասել է ՄԽ ամերիկացի համանախագահ Ջեյմս Ուորլիքը:
Ուորլիքը նշել է, որ խնդրի ռազմական լուծում գոյություն չունի, և այն պետք է լուծվի բանակցությունների սեղանի շուրջ:
«Շուտով մենք հանդիպումներ կունենանք Ադրբեջանի և Հայաստանի արտգործնախարարների հետ: Բացի այդ, մենք աշխատում ենք այս տարի Ադրբեջանի և Հայաստանի նախագահների հանդիպման վրա»,- ասել է համանախագահը:
Ուորլիքը հույս է հայտնել, որ Հայաստանը և Ադրբեջանը կպահպանեն երկխոսությունը շարունակելու խոստումը, ինչի շուրջ պայմանավորվել էին Փարիզում տեղի ունեցած հանդիպմանը:
Նրա խոսքով՝ համանախագահները տեղյակ են հայ-ադրբեջանական զորքերի շփման գծում տեղի ունեցող զինված միջադեպերից, ինչպես նաև կողմերի կրած կորուստներից: Նա նշել է, որ նման միջադեպերը ապակայունացնում են իրավիճակը և հանգեցնում ավելի մեծ բռնության:
Հիշեցնենք, ավելի վաղ Ջեյմս Ուորլիքը Twitter-ի իր էջում հայտնել էր, որ Լեհաստանում հանդիպելու է Ադրբեջանի արտգործնախարար Էլմար Մամեդյարովի հետ:
Լուսանկարը՝ Photolure-ի
