Ազատության հրապարակից բերման ենթարկված իրավապաշտպան Ավետիք Իշխանյանն այս պահին գտնվում է ոստիկանական բաժանմունքում, և դեռ որևէ քննչական գործողություն նրա նկատմամբ չի կատարվել։ Այս մասին «Առաջին լրատվական»-ի հետ զրույցում ասաց ինքը՝ Իշխանյանը։
«Ամեն ինչ կարգին է, ես հիմա գտնվում եմ ոստիկանական բաժանմունքում, բայց չգիտեմ, թե ինչի համար են ինձ բերման ենթարկել։ Սպասում եմ, որ դա ասեն»,- ասաց Իշխանյանը։
Հարցին՝ որքանո՞վ են իրավաչափ եղել ոստիկանների գործողությունները, իրավապաշտպանը դժվարացավ պատասխանել։ «Այս պահին չեմ կարող գնահատել։ Դուրս կգամ կասեմ։ Ինձ հետ ամեն ինչ կարգին է։ Վիճակս էլ նորմալ է»։
Իրավապաշտպանը նաև նշեց, որ իրենից բացի ևս 7-8 հոգի են բերման ենթարկվել Ազատության հրապարակից։
Հիշեցնենք, որ Գյումրիում տեղի ունեցած ողբերգական դեպքերից հետո ինչպես Գյումրիում, այնպես էլ Երևանում՝ Ազատության հրապարակում, բողոքի ինքնաբուխ ակցիաներ են սկսվել, որոնք պարբերաբար ուղեկցվում են ոստիկանության հետ բախումներով։
Երկու քաղաքներում էլ կան ձերբակալվածներ։
