Մոսկվայում անցկացված Հավաքական անվտանգության պայմանագրի կազմակերպության (ՀԱՊԿ) գագաթնաժողովի ավարտին կառույցի անդամ երկրների ղեկավարները քննարկեցին տարածաշրջանային մարտահրավերները, անդրադարձ կատարվեց նաև Լեռնային Ղարաբաղի հակամարտությանը:
Տարածված հայտարարության մեջ ՀԱՊԿ անդամ երկրների ղեկավարները նշել են, որ ԼՂ հիմնահարցը բացառապես խաղաղ ճանապարհով պետք է լուծվի՝ ԵԱՀԿ Մինսկի խմբի համանախագահների միջնորդությամբ, միջազգային իրավունքի սկզբունքների և նորմերի, ՄԱԿ-ի կանոնադրության, Հելսինկիի եզրափակիչ ակտի դրույթների հիման վրա:
«Առաջին լրատվական»-ի հետ զրույցում ԼՂ նախկին փոխարտգործնախարար Մասիս Մայիլյանն ասաց, որ չնայած Ռուսաստան-Արևմուտք առճակատմանը՝ ԵԱՀԿ Մինսկի խմբի համանախագահող երկրները ցանկանում են պահպանել Մինսկի խումբը:
«Հուլիսի վերջին և օգոստոսի սկզբին Լեռնային Ղարաբաղի շուրջ լարվածության էսկալացիայի, ինչպես նաև նոյեմբերի 12-ին Ադրբեջանի կողմից հայկական ուղղաթիռի խոցման հետ կապված, հայտարարություն չկար այն մասին, թե ՀԱՊԿ-ը պատրաստվում է ղարաբաղյան հակամարտության մեջ միջnրդական դեր տանել»,- ասաց Մայիլյանը:
Նրա խոսքերով՝ Ռուսաստանը, որը ՀԱՊԿ-ում առանցքային խաղացող է, նաև Մինսկի խմբի համանախագահող երկրներից է, և 1994 թվականից սկսած՝ Ռուսաստանն ու Մինսկի խմբի մյուս երկրները նույն դիրքերից են հանդես գալիս․ «Չնայած Ռուսաստանի և Արևմուտքի միջև առճակատմանը, համանախագահող երկրները մտադիր են պահպանել Մինսկի խումբը ՝ որպես բանակցային հարթակ: ՀԱՊԿ անդամ երկրների ղեկավարների հայտարարությունը հենց դրա վկայությունն է»: