«Հայաստանը չունի տնտեսության զարգացման պլանավորում, ապրում է այսօրվա օրով: Հայաստանը գտնվում է մի անորոշ վիճակում, երբ կառավարությունն անզոր է երկրի, ժողովրդի վիճակը բարելավելու համար որևէ գործողություն անելու: Վերջին 10 տարում առաջին անգամ ընդունվեց մի բյուջե, որտեղ խոսք անգամ չի գնում աշխատատեղերի մասին:
Ամենահետամնաց երկրում էլ կառավարությունը հիմնական խնդիր է դիտարկում տնտեսության զարգացման միջոցով երկրում սոցիալական խնդիրների լուծումը, որոնցից ամենակարևորը պետք է լինի ոչ թե ողորմությունը ժողովրդին, այլ իր հացը վաստակելու համար մարդկանց աշխատանք տալը: Բայց ութ ամիս անց կարող եմ ասել, որ կառավարությունը ձախողել է, անզոր է լուծելու մեր երկրի ու ժողովրդի առջև ծառացած խնդիրները»,- այսօր մի քանի լրատվամիջոցների հետ հանդիպման ժամանակ հայտարարեց «Օրինաց Երկիր» կուսակցության նախագահ Արթուր Բաղդասարյանը:
Վերջինս նաև անընդունելի համարեց այն միտքը, թե չեն թողնում՝ կառավարությանն աշխատի: Ա. Բաղդասարյանի կարծիքով, Տիգրան Սարգսյանի կառավարությունը բացառիկներից է եղել, որն ունեցել է խորհրդարանի լիակատար աջակցությունը: Նույնն էլ այսօր ունի Հովիկ Աբրահամյանի կառավարությունը՝ օրենքներ անցկացնելու, ցանկացած ռեֆորմ անելու որևէ խնդիր չունի: Այլ խնդիր է, որ կառավարությունը պետք է ունենա ծրագիր և պատասխանատվություն: Մինչդեռ Հ. Աբրահամյանը, վերջերս անդրադառնալով մեր երկրում գոյություն ունեցող խնդիրներին, հայտարարել էր, թե ինքը չունի կախարդական փայտիկ, որ հրաշքներ գործի: «Մենք հեքիաթներում չենք ապրում, որ կախարդական փայտիկից խոսենք: Ապրում ենք ռեալ իրականության մեջ»,- հակադարձեց ՕԵԿ ղեկավարը:
Վերջինս նաև ավելացրեց, թե 2005 թվականից սկսած՝ Հայաստանի արտաքին պարտքն ավելացել է հինգ անգամ, ու դրա նախահայրը Տ. Սարգսյանն է: Եվ Ա. Բաղդասարյանի խոսքերով՝ այդ պարտքն այսօր գցել են ՀՀ քաղաքացիների վրա ու հարկերն են ավելացնում:
Սակայն չէ որ երբ Տ. Սարգսյանի կառավարությունը վարկեր էր վերցնում և արտաքին պարտքն ավելացնում, այդ բոլոր տարիներին Ա. Բաղդասարյանը Անվտանգության խորհրդի քարտուղար էր, իսկ նրա ղեկավարած ՕԵԿ-ը նույն վարչապետի գլխավորած կոալիցիայում էր: Ավելին՝ այդ բոլոր վարկերը հաստատվել են Ազգային ժողովում, և դրանց կողմ էր քվեարկում նաև նույն ՕԵԿ-ը: Ինչո՞ւ այդ ժամանակ Ա. Բաղդասարյանն արտաքին պարտքի մասին իր մտահոգությունը չէր բարձրաձայնում և ՕԵԿ-ին հորդորում դեմ քվեարկել վարկային համաձայնագրերին:
Ա. Բաղդասարյանը գտավ այս հարցի պատասխանը և ասաց, թե վարկային ռեսուրսներն անհրաժեշտ են յուրաքանչյուր երկրին, և դրանց արդյունավետ օգտագործումը կարող է օգուտ բերել: Իսկ ՀՀ արտաքին պարտքից մոտ 1.5 մլրդ դոլարը ետ է գնացել վարկատու միջազգային կազմակերպություններին՝ որպես խորհրդատվության համար վճարվող գումար:
«Այդ վարկային ռեսուրսների հիմնական մասը չի ծառայել իր նպատակին: Ո՞վ է պատասխանատու: Իրականացնողը: Հնարավորություն տվողը չի պատասխանատու: Որպես վարչապետ՝ Տիգրան Սարգսյանը ՀՀ արտաքին պարտքը մեծացնելու նախաձեռնողը հանդիսացավ: ՀՀ-ին վստահում էին այդ ռեսուրսները, բայց այլ խնդիր է, թե ինչպես ծախսվեցին դրանք: Գումարը տնտեսության առողջացման մեխանիզմ է, այլ խնդիր է, որ պետք է հետևես՝ այդ միջոցները ծառայեն իրենց նպատակին»,- պատասխանեց Ա. Բաղդասարյանը:
