«Այսօր հասարակության մեջ չկա սահմանադրական փոփոխությունների պահանջ, որովհետև հասարակությունն այսօր գտնվում է ծայրաստիճան ծանր սոցիալ-տնտեսական վիճակում, և նրա համար դա ոչինչ չարժե»,- այսօր մի քանի լրատվամիջոցների հետ զրույցում ասաց «Օրինաց երկիր» կուսակցության նախագահ Արթուր Բաղդասարյանը:
Նա նաև հայտարարեց, որ ՕԵԿ-ը չի պաշտպանի այդ փոփոխությունները նաև այն պատճառով, որ Հայաստանի հիմնական քաղաքական ուժերը նման պահանջ չեն դնում: Բացի դրանից՝ Ա.Բաղդասարյանի խոսքով՝ այդ փոփոխությունները չեն նպաստում մեր երկրի ինտեգրացիոն գործընթացներին, ժողովրդավարության զարգացմանն ու բարեկեցությանը: Ավելին՝ իշխանությունների նախաձեռնած սահմանադրական փոփոխությունները կարող են վտանգավոր լինել ՀՀ քաղաքական զարգացումների համար:
ՀՀ-ն անդամակցում է Եվրասիական տնտեսական միությանը, որը, ՕԵԿ ղեկավարի խոսքով, յուրօրինակ նախագահական ակումբ է: Եվ ՀՀ նախագահը չունենալով էական դերակատարում՝ այդ ակումբում չի կարող մեր երկրի համար որևէ որոշում կայացնել: Բացի դրանից՝ Ա.Բաղդասարյանը կարծում է, որ սահմանադրական փոփոխությունները նպաստելու են իշխանությունների վերարտադրմանը:
Ա.Բաղդասարյանն անդրադարձավ նաև Հայաստանի տնտեսական խնդիրներին և հայտարարեց, որ մեր տնտեսության զարգացման խոչընդոտներից մեկն էլ այն է, որ չկա պլանավորում: «Այնպիսի իրավիճակ է, երբ երկրի վիճակը բարելավելու համար կառավարությունն անզոր է որևէ գործողություն անել: Վերջին 10 տարում Հայաստանում առաջին անգամ ընդունվեց մի բյուջե, որում խոսք չկա անգամ աշխատատեղերի ստեղծման մասին: Ութ ամիս անց կարող եմ ասել, որ կառավարությունն իսկապես իրեն ձախողել է»,- հայտարարեց նա: