Հնագետները ծանրակշիռ ապացույց են գտել, որ Դավիթ և Սողոմոն արքաները իրական պատմական կերպարներ են եղել և իսրայելական թագավորությունը կառավարել են հենց մ. թ. ա. IX-X դարերում: Գազայից արևելք գիտնականները 6 կավե կնիք են գտել, որոնք վկայում են այդ շրջանում պետության գոյության մասին: Պեղումների արդյունքները ներկայացված են Near Eastern Archaeology ամսագրում:
Պրոֆեսոր Ջիմմի Հարդինի խոսքով՝ հայտնաբերված կնիքները նույն գործառույթն են կատարել, ինչ և ոսկուց կնիքները, այսինքն՝ օգտագործվել են պաշտոնական նամակագրությունն ամրացնելու համար: Այդպիսի եզրային շրջանում կնիքների հայտնաբերումը ցույց է տալիս, որ այդ տարածքը եղել է պետական ազդեցության գոտում: Ավելին՝ դրանք գիտությանը հայտնի միակ կնիքներ են, որոնք թվագրվում են մ. թ. ա. X դարով:
Դավիթ արքայի պատմականությունը, ինչպեսև միասնական իսրայելական թագավորության պատմականությունը քննարկումների առիթ է: Բիբլիական մինիմալիզմի դպրոցը Դավիթի, Սողոմոնի և իսրայելական միասնական միապետության մասին տեքստը դիտարկում է որպես գաղափարախոսական կառուցվածք, որը ստեղծվել է մ. թ. ա. VI դարում քահանայական շրջանակներում: Այդ դպրոցի տեսանկյունից՝ Դավիթը նույնքան իրական է, որքան Արթուր արքան: Որոշ գիտնականներ Դավիթին և Սողոմոնին համարում են պատմական կերպարներ, բայց ոչ թե հսկա պետությունների, այլ փոքր իշխանությունների արքաներ: