Skype ծառայությունը թողարկել է Skype Translator-ի թեսթային տարբերակը, որի շնորհիվ հնարավոր կլինի ավտոմատ կերպով թարգմանել այլ լեզվող խոսող զրուցակցի խոսքը: Այս մասին հաղորդում է lenta.ru-ին հայտնել են ընկերության մամուլի ծառայությունից:
«Ավելի քան մեկ տասնամյակ Skype-ը քանդել է աշխարհագրական խոչընդոտները՝ ապահովելու համար տեսա- և ձայնա- հաղորդակցություն: Օգտագործելով Microsoft Research լաբորատորիայի նորարարությունները՝ Skype-ը վերացնում է ևս մեկ խոչընդոտ՝ լեզուն, որով մարդիկ խոսում են»,- ասել է Skype ընկերության ներկայացուցիչը:
Skype Translator-ի նախնական տարբերակը համաժամանակյա թարգմանություն կապահովի դեռևս միայն երկու լեզուների միջև՝ իսպաներեն և անգլերեն: Բացի այդ, Skype-ի օգտատերերը կկարողանան արագ հաղորդագրությունները թարգմանել ավելի քան 40 լեզվով: Skype-ի նոր գործառույթը ստուգելու համար պետք է գրանցվել Skype Translator կայքում, որի ընթացքում անհրաժեշտ է ընտրել իսպաներենը և օգտվել Windows 8.1 հարթակում գործող սարքից:
Skype Translator-ը օգտագործում է խոսքի ճանաչման, ավտոմատ թարգմանության և մեխանիկական ուսուցման տեխնոլոգիան: Այնպես որ, որքան հաճախ օգտագործվի ծառայությունը, այնքան հստակ կլինի թարգմանությունը: Ծրագիրը մշակողների խոսքերով՝ Skype-ի երկարաժամկետ նպատակն է համաժամանակյա թարգմանությամբ ապահովել հնարավորինս շատ լեզուներով և հարթակներում: Skype Translator-ի էջում օգտատերերը կարող են նաև նշել իրենց լեզվական նախասիրությունները, որոնք Skype-ը խոստանում է հաշվի առնել ծառայությունում նոր լեզուներ ավելացնելիս: