«Շուկայական լողացող կուրսը և էժան ազգային դրամը արտահանողների համար նպաստավոր են: Արտահանման դեպքում ստանում ես տարադրամ, փոխանակում ես և քո աշխատավարձերը, հարկերն ու այլ ծախսերը կատարում ես դրամով: Ինչքան դրամն արժեզրկված լինի, այնքան դու տնտեսական իմաստով մեծ լծակ կունենաս. ինչպես ԱՄՆ-ն արեց վերջին 6-7 տարիներին եվրո-դոլար հարաբերության դեպքում»,- լրագրողների հետ զրույցում ասաց Արդյունաբերողների և գործարարների միության նախագահ Արսեն Ղազարյանը՝ անդրադառնալով վերջին օրերին դրամի կտրուկ արժեզրկմանը:
Բայց մյուս կողմից էլ Ա. Ղազարյանի կարծիքով՝ եթե դրամն արժեզրկվում է, ապա մեզ մոտ պետք է գնա աշխատավարձերի ինդեքսիկացիա: «Թե մասնավոր համակարգը, թե պետական համակարգը անպայման պետք է աշխատավարձերը բարձրացնեն: Պետությունը դա արեց տարվա կեսին, մասնավոր համակարգում ես դեռ չեմ տեսնում, որ ինդեքսավորում իրականացվի: Եթե դրամի արժեզրկումը մնա այս մակարդակի վրա և նույնիսկ որոշակի աճ ունենա, ես իմ ձեռնարկությունում պետք է իրականացնեմ աշխատավարձերի բարձրացում՝ որպես կորստի փոխհատուցում, որ մարդկանց գնողունակությունը չընկնի»,- ավելացրեց Ա. Ղազարյանը:
Վերջինս տնտեսական շուկայի համար շատ կարևոր է համարում կայուն և լողացող կուրսը: Եթե անգամ արժեզրկում էլ լինի, ապա այդ տատանումը պետք է լինի ամսական մեկ-երկու տոկոսի սահմաններում և ոչ թե 2009թ. նման, երբ 1 օրում դրամը դոլարի նկատմամբ արժեզրկվեց միանգամից 40 դրամով, հետագա օրերին հասավ մինչև 70-75 դրամի: Նրա խոսքով՝ թռիչքային նման տատանումները վտանգավոր են բիզնես-միջավայրի համար, քանի որ գործարարները երկրի ներսում իրենց ծախսերը դրամով են կատարում:
«Մասնագետները գտնում են, որ մեր դրամի իրական արժեքը պետք է ավելի արժեզրկված լինի, քան այսօր ունենք, որպեսզի գա իր բնականոն հարաբերակցությանը»,- ասաց Ա. Ղազարյանը, բայց չկոնկրետացրեց, թե մեկ դոլարը որքա՞ն պետք է արժենա՝ 450, 500, թե՞ 550 դրամ:
Թե Կենտրոնական բանկը, թե միջազգային ֆինանսական կառույցները 2014թ. համար տնտեսական ավելի ցածր աճ են կանխատեսում, քան կանխատեսել էին տարեսկզբին: Իսկ Ռուսաստանում գոյություն ունեցող տնտեսական ծանր վիճակն ու այդ երկրի ռուբլու արժեզրկումը միգուցե ավելի բացասական ազդեցություն կթողնեն այդ ցուցանիշի վրա:
Հարցին՝ նման պայմաններում արդյոք 2015թ. Հայաստանում նորից տնտեսական ճգնաժամ չի՞ լինի, Ա. Ղազարյանը պատասխանեց. «Չեմ կարծում, որ ճգնաժամին մոտ իրավիճակ լինի, բայց մեզ սպասվում է շատ ծանր աշխատելու տարի: Հատկապես՝ տեղական արտադրությանը: Հանգիստ ռեժիմով աշխատելը վերանում է: Պետք է թե մենեջմենթդ փոխես, թե տեխնիկական հագեցվածությունդ, թե լաբորատորիաներդ նորմալ վերազինես, որ կարողանաս ծավալներդ մեծացնել: Ես չեմ կարծում, որ ճգնաժամ կունենանք: Մենք կունենանք ծանր աշխատանքային տարի»: