ԱՄՆ Ինդիանա նահանգի ավտոճանապարհներին սկսել են տեղադրել կրիաների անցումների նշաններ՝ հայտնում է Tribune Star-ը: Թերրե-Հոթ քաղաքից ոչ հեռու ավտոմայրուղու 2 հատվածներում տեղադրվել են «Կրիաների անցում» նշանները: Մարզի իշխանությունները կարծում են, որ այդպիսով հնարավոր կլինի նվազեցնել կենդանիների մահացությունը:
Ներկայումս միայն 2 նման նշան է դրված, սակայն հետագայում դրանց թիվը կաճի: Մարզի պարկերի և հանգստավայրերի պահպանության դեպարտամենտի ղեկավար Էմբեր Սլոթերբեքը հայտարարել է, որ նշանները կրիաների անվտանգության մեծացմանն ուղղված ծրագրի միայն առաջին մասն են:
Նա նշել է, որ կրիաները սովորաբար երթևեկելի մասը նույն տեղից են անցնում: Սակայն նրանք շատ հաճախ ընկնում են մեքենայի տակ, քանի որ դժվար նկատելի են և չեն կարողանում արագ փախչել:
Վերջին տարում կամավորները կարողացել են փրկել մոտ 300 կրիայի: Թե քանի կենդանի է ավտովարորդի զոհ դարձել՝ չի նշվում:
