«Մենք մեր ջանքերն ուղղում ենք հարցի դիվանագիտական ճանապարհով լուծմանը, որովհետև կարծում ենք՝ մեր հարևանները կհասկանան, որ միջազգային մարդասիրական նորմերի կանոնների համաձայն՝ պետք է թույլ տրվի ուղղաթիռի ընկած վայրի ուսումնասիրումն ու մնացած աճյունների ուսումնասիրումն ու տեղափոխումը»,- Եռաբլուրում անդրադառնալով հայկական ռազմական ուղղաթիռի խոցմանը՝ ասաց պաշտպանության նախարար Սեյրան Օհանյանը:
Անդրադառնալով Ադրբեջանի այն հայտարարությանը, թե հնարավոր է փոխանակում կատարել ադրբեջանցի ռազմագերիների և մահացածների հետ, նախարարն ասաց. «Կարծում եմ՝ այդ հարցը պետք է ուղղել Լեռնային Ղարաբաղի Հանրապետության ղեկավարությանը, և կարծում եմ նաև, որ բոլորիս համար ակնհայտ է՝ այդ դիվերսանտները հանցագործություն են կատարել, ինչի համար պետք է պատասխան տան»:
Ինչ վերաբերում է միջազգային կազմակերպությունների արձագանքին և, ըստ էության, Ադրբեջանին հասցեագրված ուղիղ մեղադրանքներին, Սեյրան Օհանյանն ասաց. «Կարծում եմ, որ ԵԱՀԿ Մինսկի խմբի անդամների հետ մեր կատարած դիվանագիտական աշխատանքը, հանդիպումները տվեցին իրենց արդյունքը, որպեսզի համանախագահները կոնկրետ հայտարարություն անեն և Ադրբեջանին կոչ անեն, որպեսզի վերջինս թույլ տա մեկնել դեպքի վայր, ականազերծման աշխատանքներ կատարել և գտնել աճյունը»:
Սեյրան Օհանյանը հավելեց, որ ուղղաթիռի անձնակազմը ուսումնավարժական թռիչքներ կատարելու ժամանակ է խոցվել, ընդ որում՝ մեր տարածքում, և դա բոլոր տիպի նորմերի խախտում է. «Ինձ թվում է՝ նրանց նախօրոք է ցուցում տրվել»:
Առավել մանրամասն՝ մեր տեսանյութում:
