ԱԺ նախագահ Գալուստ Սահակյանը այսօր պատասխանելով հարցին, թե ընդդիմության հանրահավաքնե՞րն էին պատճառը, որ Սերժ Սարգսյանը կառավարությանը հորդորեց ևս մեկ անգամ քննարկել Քառյակի ներկայացրած 12 կետերը, ասաց. «Ի՞նչ պատասխանեմ, ընդդիմությանն ուրախացնե՞մ: Դուք չզգացի՞ք, որ մենք ընդամենն ականջալուր եղանք հարցադրումներին, ոչ թե հանրահավաքներին: Որը որ հնարավոր է, բնական է՝ կատարում ենք, առավել ևս առանց հանրահավաքի էլ քաղաքական ուժերը խորհրդարանում մշտապես քննարկումներ են անում, ցանկացած հարց քննարկում են: Սերժ Սարգսյանը նման հայտարարություն չի արել, որ պետք է վերանայել, պարզապես ասել է, որ այդ կետերը կարելի է քննարկել»,- նշեց նա:
Ինչ վերաբերում է Սերժ Սարգսյանի հորդորին` թշնամանքով չվերաբերվել ընդդիմության առաջարկներին, և հարցին, թե մինչև հիմա թշնամանք կա՞ր, Սահակյանն ասաց. «Կարծում եմ, որ մեր հանդուրժողականության հետևանքով է, որ այսօր և՛ լրագրողներն ունեն ազատ խոսքի իրավունք, և՛ ընդդիմությունն է կարողանում առանց արգելքների քայլեր անել, այնպես որ՝ մենք միշտ էլ հանդուրժողական ենք եղել»,- ընդգծեց նա:
Ինչ վերաբերում է Գագիկ Ծառուկյանի հայտարարությանը՝ եթե սահմանադրական բարեփոխումների ու Ընտրական օրենսգրքի վերաբերյալ իրենց առաջարկները չընդունեն, հազարներով կփակեն փողոցները ու կպարտադրեն իշխանափոխություն, Գալուստ Սահակյանն ասաց. «Այլ բան է՝ միտինգին ասելը, այլ բան է՝ քաղաքական իրավիճակը, այլ բան՝ այն միջոցները, որոնք պիտի գործադրվեն, այլ բան է խոսքը. բոլորն էլ կարող են խոսել հարյուր հազարից, երկու հարյուր հազարից:
Մեզ մոտ ձևավորվում է քաղաքական ուժեր կամ ուժ և սկսում է ժողովրդին համոզել իր հետևից գնալ, իսկ դասական քաղաքականության մեջ ինքը ժողովուրդն է ոտքի կանգնում, իսկ քաղաքական ուժերն ուղղորդում են»,- ամփոփեց նա:
Հարցին՝ որքա՞ն է պատրաստվում Հանրապետական կուսակցությունը մնալ իշխանության, ԱԺ նախագահը պատասխանեց՝ մինչև Լեռնային Ղարաբաղի խնդրի կարգավորումը: