Կենտրոն և Նորք-Մարաշ վարչական շրջանների ընդհանուր իրավասության դատարանում դեռ չսկսված ավարտվեց Հայկ Կյուրեղյանի գործի դատական քննության անդրանիկ նիստը:
Հայկ Կյուրեղյանին դիմավորեցին «Հերոս, հերոս» բացականչություններով:
Ամբաստանյալը դատավոր Բեկթաշյանի ներս մտնելու պահին ոտքի չկանգնեց: Նա ասաց, թե չի հարգում դատարանը, դրա համար չի կանգնում: «Համարում եմ դատարանը ինքնակոչ կառավարության խամաճիկ դատարան, սա ՀՀ դատարան չի, ռեժիմի դատարան է: Դատարաններում ես տեսել եմ միայն արդարության բռնաբարում, սա արդարության իրականացման մարմին չի, դրա համար չեմ հարգում էս մարմինը»:
Նիստին ներկայացել էր «Ոստիկանություն» մակագրությամբ համազգեստով չորս տուժող և քաղաքացիական հագուստով մեկ տուժող:
Դատական նիստին չէր ներկայացել Հայկ Կյուրեղյանի շահերը նախաքննության ժամանակ պաշտպանած փաստաբան Արա Զաքարյանը:
«Ես դեռ չեմ որոշել՝ պաշտպանի մասնակցության հարցը»,- ասաց Հայկ Կյուրեղյանը: Նախագահողը հայտնեց, որ ամբաստանյալը պաշտպանից կարող է հրաժարվել միայն պաշտպանի ներկայությամբ:
Դատական նիստը ամեն դեպքում պաշտպանի բացակայությամբ շարունակվել չէր կարող: Նիստը հետաձգվեց:
Լուսանկարը՝ Photolure-ի