«Մտավոր սեփականության դեմ ուղղված հանցագործության դեմ պայքարը մշտապես գտնվել է ոստիկանության ուշադրության ներքո, և հաշվի են առնվել այն վտանգները, որոնք վնաս են պատճառում մեր ստեղծագործողներին, գյուտարարներին, սեփականատերերին, որոնք զրկվում են շահույթ ստանալ իրենց ստեղծածից»,- այս մասին այսօր լրագրողների հետ զրույցում ասաց ՀՀ ոստիկանության կազմակերպված հանցավորության դեմ պայքարի գլխավոր վարչության 1-ին վարչության 5-րդ բաժնի պետ, ոստիկանության փոխգնդապետ Արթուր Վարդերեսյանը:
Նշենք, որ Հայաստանում մտավոր սեփականության ոլորտում պատասխանատվություն նախատեսված է հիմնականում 3 տիպի օբյեկտների ապօրինի օգտագործման համար: Դա հեղինակային և հարակից իրավունքների խախտումներն են, ապրանքային նշանի և ֆիրմային անվանման ապօրինի օգտագործումն է և արտոնագրային իրավունքի խախտումը:
Ըստ բաժնի պետի՝ նախորդ 4 տարվա ընթացքում իր ղեկավարած վարչությունը 75 դեպք է բացահայտել, որոնցից 45-ը վերաբերել է հեղինակային և հարակից իրավունքների խախտումներին, 22-ը՝ ապրանքային նշանների ապօրինի օգտագործման դեպքերին:
«Խախտումների բնույթը հիմնականում վերաբերում է կեղծ ծրագրերով համակարգիչների վաճառքով զբաղվող ընկերություններին, կաբելային օպերատորների կողմից հեռուստաալիքների հեռարձակումն է առանց թույլտվության»,- ասաց Վարդերեսյանը:
Վերջինիս խոսքով՝ իրենք վերջին տարիներին մշակել են օրենսդրական փոփոխություններ, որոնք բարելավում են ոլորտը: