Այսօր՝ Հոկտեմբերի 27-ի 15-րդ տարելիցին, Եռաբլուր էր այցելել ԵԿՄ-ն՝ Մանվել Գրիգորյանի գլխավորությամբ: «Առաջին լրատվական»-ի հարցին ի պատասխան, թե, իր կարծիքով, ե՞րբ կբացահայտվի Հոկտեմբերի 27-ը, գեներալն ասաց. «Հոկտեմբերի 27-ը էդ երբ ա փակ եղել, որ մի հատ էլ պիտի թազա բացվի»: Մեր հստակեցումից հետո, թե խոսքը բացահայտման մասին է, ասաց. «Մի մասը պատժված ա, մի մասին էլ Աստված ա պատժում»:
Գեներալ Մանվելը լրագրողների հետ զրույցում բարկացավ: Հարցին՝ ո՞ւմ էր ձեռնտու Սպարապետին սպանել՝ նա պատասխանեց. «Բոլոր այն մարդկանց, ովքեր հայ ժողովրդի վատն են ցանկանում՝ անկախ նրանից, թե ով են՝ հայերի մեջ կլինեն, թե ինչ ազգերի մեջ՝ կապ չունի»:
Հարցին՝ իսկ այսօր Դուք այդ մարդկանց կողքին չե՞ք՝ գեներալը մի կերպ իրեն զսպեց. «Չելավ, շատ կոպիտ եք ասում: Շատ կոպիտ ասեցիր, բայց դրա պատասխանը՝ ես նման մարդկանց հետևին եմ ձեռ տալիս, էլա՞վ: Որ սիրուն լինի քո հմար: Եթե նկատի ունես էսօրվա իշխանությանը, շատ վատ է, որ այսօրվա իշխանության մասին այդ կարծիքն ունես: Հասկանո՞ւմ ես, շատ վատ է»:
