Երեկ հանդիպել են ոչ իշխանական եռյակի՝ «Ժառանգության», ԲՀԿ-ի և ՀԱԿ-ի առաջնորդները: Գրեթե միաժամանակ խորհրդարանում լրագրողների հարցերին է պատասխանել Հովիկ Աբրահամյանը, որը վերադարձել է Իրանից և ԱՄՆ-ից:
Այս երկու իրադարձությունները ուշագրավ են, որովհետև Հ. Աբրահամյանը հիմնականում անդրադարձել է հենց ոչ իշխանական ուժերի գործունեությանը և մի քանի ուշագրավ հայտարարություններ արել` սկսած իր խնամի Գագիկ Ծառուկյանի պահվածքը, ըստ էության, ոչ կոռեկտ գնահատելուց՝ նախագահական թեկնածության մասին խոսելու առումով, վերջացրած ՀՀ-ում իշխանափոխության հիմքերի և նախագահին փոխելու անհնարինության մասին հայտարարությամբ:
Այսինքն` Հ. Աբրահամյանը ոչ իշխանական առաջնորդների եռյակի հանդիպման ֆոնին իր համար փորձել է լիակատար ալիբի ապահովել Սերժ Սարգսյանի առաջ: Ակնհայտ է, որ Աբրահամյանը խորհրդարանում լրագրողների հարցերին պատասխանել է հենց այդ խնդիրներին անդրադառնալու, այսինքն` հենց այդ հայտարարություններն անելու համար:
Հիշենք, որ ԱՄՆ մեկնելուց առաջ Աբրահամյանը լրագրողների հարցերին պատասխանելուց հրաժարվել էր ՀՀԿ գործկոմի նիստի օրը, երբ սովորաբար սիրահոժար պատասխանում է հարցերին: Իսկ սովորաբար ԱԺ-ում հարցերի չպատասխանելու պայմաններում Աբրահամյանն այս անգամ խոսել է:
Սրան զուգահեռ` երեկ տեղի է ունեցել ՀԱԿ և ԲՀԿ խորհրդարանական խմբակցությունների ղեկավարների հանդիպումը ՀՀ-ում ԱլԳ հարցերով դեսպանների հետ, որի ընթացքում քննարկվել են Եվրասիական միությանը ՀՀ անդամակցության և այդ կոնտեքստում ԵՄ հետ հարաբերությունների շարունակության հարցեր:
Սրան զուգահեռ` ԲՀԿ նախագահ Գագիկ Ծառուկյանը գարեջրի բաժակ էր բարձրացնում ՌԴ դեսպան Վոլինկինի հետ՝ իր իսկ կազմակերպած հայ-ռուսական արդյունաբերական ցուցահանդեսի ընթացքում:
Ամենևին բացառված չէ, որ Հ. Աբրահամյանը զգում է նաև եռյակի հետ, այսպես ասած, կապի կորուստ և կասկածում, որ ոչ իշխանական ուժերը այլ խաղ են խաղում, առանց իրեն: Ավելի շուտ, իհարկե, ԲՀԿ-ն, և հավանական է, որ հենց դրա համար է Աբրահամյանը խնամի Ծառուկյանին մեղադրում ոչ կոռեկտության մեջ: Այլ կերպ ասած` Աբրահամյանն ակնարկում է, որ Ծառուկյանը պայմանավորվածություններ է խախտում, և այդ դեպքում ինքը կանգնելու է Սերժ Սարգսյանի կողմը:
Այս կոնտեքստում շատ հետաքրքրական է լինելու, թե հոկտեմբերի 24-ին ինչպես է վարվելու ԲՀԿ-ն Աբրահամյանի հետ՝ հանրահավաքում թույլ կտա՞ հնչեցնել նրա անունը, թե՞ կխնայի՝ ինչպես հոկտեմբերի 10-ին:
