Գործարար, շինարարական և այլ բիզնեսներով զբաղվող նախկին ՀՀԿ-ական պատգամավոր Հակոբ Հակոբյանին (Ճոյտ) ոգևորել է ԵՏՄ-ին Հայաստանի միանալու փաստը, սակայն այն առումով, որ դրանից հետո Եվրոպան ավելի շատ ուշադրություն կդարձնի Հայաստանին, ավելի շատ ներդրումներ կկատարի, որպեսզի դրանով Հայաստանին պոկի Ռուսաստանի հետ համագործակցելուց:
«Այդպիսով Եվրոպան ավելի շատ ներդրումներ, ծրագրեր, ֆինանսավորում կիրականացնի Հայաստանում, ինչը մեզ համար միմիայն շահեկան իրավիճակ կստեղծի, քանի որ մենք Ռուսաստանին որպես գործընկեր արդեն իսկ ունենք, իսկ եվրոպացիք կփորձեն իրենց ձևերով ամեն ինչ անել, որ մենք իրենց ձգտենք: Եվրոպան երբեք, այսպես ասած, չի խռովի Հայաստանից ԵՏՄ-ին միանալու համար և չի ասի՝ ընտրել ես Ռուսաստանը, դե, գնա այնտեղ: Նրանք ամեն ինչ կանեն, որ մենք իրենց ինտեգրվենք»,- «Առաջին լրատվական»-ի հետ զրույցում ասաց Հակոբյանը:
Նրա խոսքով՝ Եվրոպան շատ խելացի է և գիտի, որ հնարավոր է քաղաքական իրավիճակ փոխվի, և քաղաքական մեծամասնությունը ձգտի դեպի Եվրոպա: «Հետևաբար Եվրոպան ավելի մեծ ոգևորությամբ կաջակցի Հայաստանին: Կավելանան գրանտային և այլ կարգի ծրագրերը. դուք առաջիկայում կհամոզվեք դրանում»,- ասաց գործարարը:
Նրա խոսքով՝ ԵՏՄ-ին միանալուց հետո Հայաստանի համար իսկապես լայն հեռանկարներ կբացվեն ռուսական շուկայում, պարզապես Հայաստանը պետք է իր ապրանքները արտադրի այնպիսի չափանիշներով, որ դրանք կարողանան մրցել դրսի ապրանքների հետ: Այլ կերպ ասած՝ համապատասխանեն եվրոպական ստանդարտներին:
«Որակը մնում է որակ, Ռուսաստանն այլևս նախկին Ռուսաստանը չէ: Հիմա նոր Ռուսաստան է՝ նոր ձևաչափերով, նոր ստանդարտներով: Այսօրվա վիճակով ավելի բարդ է, օրենքները շրջանցել չի լինում, ստուգումները խստացել են: Եթե մենք համապատասխանեցնենք մեր ապրանքները այդ ստանդարտներին, ապա երկուստեք ձեռնտու կլինի: Այսուհետ գոնե ապրենք, գործենք ու գոնե մի քիչ նմանվենք զարգացած երկրներին»,- նկատեց Հակոբյանը:
Գործարարի խոսքով՝ Հայաստանը մեծ պոտենցիալ ունի ռուսական շուկա հանելու թռչնամիս, ձու, կաթնամթերք, որոնք նախկինում ավելի շատ Ռուսաստան գնում էին Ուկրաինայից, իսկ հիմա այդ տեղը կարող է զբաղեցնել Հայաստանը: Բացի դրանից՝ կարող են արտահանել գյուղմթերք, բանջարեղենի ցանկացած տեսակ, որը շատ լավ որակ ունի, և խնդիր չի լինի ռուսական շուկայում հաստատվելու համար:
«Պարզապես մենք պետք է կարողանանք կազմակերպել և այդ ապրանքները դուրս տանել, ինչի համար պետք են պետական մտածողություն ունեցող ղեկավարներ, որպեսզի կարողանան այդ գործընթացն այնպես կազմակերպել, գյուղացի-արտահանող կապն այնպես ստեղծել, որ ճիշտ լինի, և խնդիրներ չառաջանան:
Բացի այդ՝ արդեն իսկ պետք է հողի հարկերը 5 տարով զիջեն, ոռոգման ջուրը նույն ժամանակահատվածով անվճար դարձնեն, և կտեսնեք, որ գյուղացին, մարդիկ կսկսեն զբաղվել այդ բիզնեսով: Եթե գյուղացին մոտենա հողին և սկսի աշխատանքներ տանել, պետությունն ավելի շատ կշահի, քան հողերն անմշակ թողնելով և հարկեր գանձելով»,- ասաց Հակոբյանը:
Այդ իմաստով նա շատ լավ քայլ է համարում փոխվարչապետ Արմեն Գևորգյանի փոփոխությունը: «Նա ասֆալտի վրա մեծացած տղա է և այսօրվա վիճակով շատ մեծ վնասներ է պատճառել մեր գյուղացուն և գյուղատնտեսությանը: Նա մասնագետ չէր և ոչ էլ իր աշխատանքից էր գլուխ հանում: Այդ պաշտոնում այնպիսի մեկին պետք է նշանակեն, որ կապված է մարզերի հետ և գլուխ է հանում գյուղատնտեսությունից և գյուղացու հոգսերից: Իսկ տարբեր մարդկանց օգնական աշխատած և ասֆալտի վրա մեծացած այդ տղան գյուղատնտեսության հետ կապ չուներ, ինչի պատճառով էլ մենք ունենք այսօրվա վիճակը»: