«Հայաստանի կառավարությունն իր առջև դրել է նպատակ՝ Հայաստանն ապահովելու ժամանակակից համաշխարհային տնտեսության և տարածաշրջանային զարգացումներում առաջատար դիրքերով»,- այսօր «Հայաստանի արտահանման ուղղվածություն ունեցող արդյունաբերական ճյուղերի մրցունակության բարձրացման ու արդիականացման և շուկան մատչելի դարձնելու միջոցով» ծրագրի մեկնարկից հետո ասաց ՀՀ էկոնոմիկայի նախարար Կարեն Ճշմարիտյանը:
Վերջինս UNIDO-ի հետ ստորագրեց ծրագրային փաստաթուղթ, որի շրջանակներում նախատեսվում է Հայաստանում զարգացնել թեթև արդյունաբերությունը, ինչպես նաև նպաստել տարածաշրջանային և միջազգային շուկաներում Հայաստանի արդյունավետ ինտեգրմանը:
Երկամյա ծրագիրը, որի բյուջեն կազմելու է 1 միլիոն դոլար, օգնելու է ՓՄՁ-ներին զարգացնել և արդիականացնել իրենց տեխնիկական կարողությունները՝ որակյալ և բարձրարժեք դիզայնով հայկական արտադրանքը շուկա հանելու նպատակով:
«Հագուստի արտադրության ոլորտում մենք տարեսկզբից արդեն իսկ 10 տոկոսի սահմաններում աճ ունենք: Ներդրումներն էլ իրականացվում են գործող կազմակերպություններում: Այս ոլորտում իսկապես նկատվում է և պայմանագրերի, և արտադրության աճ»,- լրագրողների հետ զրույցում ասաց Արդյունաբերության զարգացման հիմնադրամի տնօրեն Հայկ Միրզոյանը:
«Արտահանմանն ուղղված արդյունաբերական քաղաքականության ներքո գերակա ուղղություն է նաև թեթև արդյունաբերությունը: Եվ եթե մենք հիմա դիտարկենք նախորդ տարիների թվերը, կտեսնենք, որ ամեն տարի դինամիկ աճ է նկատվել»,- իր հերթին ասաց էկոնոմիկայի նախարարության արդյունաբերության քաղաքականության վարչության պետ Արմեն Եգանյանը:
Նրա խոսքով՝ դեռևս բավականին ցածր մակարդակի վրա է շուկայում տեղական ապրանքի մակարդակը: Տեղական ապրանքը շուկայում զբաղեցնում է մոտ 30 տոկոս, և առաջիկա միջոցառումներն ուղղված են հենց այդ տոկոսի աճին:
«Կառավարությունը որպես գերակա ուղղություն է հայտարարել թեթև արդյունաբերությունը և այդ ոլորտի համար մշակել ռազմավարություն, որը ենթադրում է նաև աջակցության մի շարք գործիքներ, իսկ որպես թիրախներ նշված են և արտահանման ծավալների բարձրացումը, և ներքին շուկայում իրացման ծավալների մեծացումը»,- հավելեց Եգանյանը: