Հուլիսի 11-ին Ծաղկաձորի «Մարիոթ» հյուրանոցում դաժան ծեծի ենթարկված Աբովյանի նախկին քաղաքապետ Կարո Իսրայելյանը թեև դուրս է գրվել հիվանդանոցից, բայց դեռ դժվարությամբ է տեղաշարժվում, ծռմռված է՝ իր ասելով, բայց բողոք չունի իրեն ծեծի ենթարկողների դեմ: «Լավ են արել, ջահել են եղել, մի հիմարություն արել են, անցավ գնաց: Չեմ դժգոհում»,- «Առաջին լրատվական»-ի հետ զրույցում ասաց Իսրայելյանը:
Հիշեցնենք, որ դեպքը տեղի էր ունեցել հունիսի 11-ին: Կարո Իսրայելյանը իրեն ծեծի ենթարկած Վարդան անունով տղայի հետ վիճաբանության էր բռնվել «Սենատոր» խաղատանը, որը գտնվում է «Մարիոթ» հյուրանոցին կից, ապա դուրս էր եկել՝ տուն գնալու նպատակով, և նկատել էր, որ իրեն հետևում են: Մեքենան կայանել էր Ծաղկաձորի ոստիկանության դիմաց՝ ավելի ապահով լինելու նպատակով, սակայն հենց ոստիկանության բակում մեքենայի մեջ Վարդանը սկսել էր ծեծի ենթարկել Իսրայելյանին, ապա քաշել-գցել էր գետնին և մոտ 10 րոպե դաժանաբար ծեծել՝ այնքան, մինչև Իսրայելյանը կորցրել էր գիտակցությունը:
Վերջինս դեպքից հետո հիվանդանոցում Գագիկ Շամշյանին բորբոքված պատմել էր դեպքի մանրամասները և նշել, որ օլիգարխների անդաստիարակ զավակները պետք է անպայման պատասխան տան:
«Իրա նմանները պետք ա վերանան: Իրա նման բոլորը պետք ա վերանան: Էդ հարուստների երեխաները արդեն չափ ու սահմանն անցել են: Հերիք էլավ, բոլ էղավ: Լավ էլ տեսել եմ, 5 հատ 9 համարներով սև մերսեդես էր, որը ծեծից հետո 120 արագությամբ հեռացավ դեպքի վայրից»,- պատմել էր Իսրայելյանը:
Այսօր, սակայն, մեզ հետ զրույցում նա բոլորովին այլ կերպ էր տրամադրված: «Դե, ջահել են, արել են, հիմարություն են արել, լավ են արել, անցել գնացել ա: Վեճ ա եղել, անցել գնացել ա»:
«Առաջին լրատվական»-ի տեղեկություններով՝ նախկին քաղաքապետի տրամադրվածության կտրուկ փոփոխությունը պայմանավորված է Գագիկ Ծառուկյանի զանգով: Մեր տեղեկություններով՝ Իսրայելյանին ծեծի ենթարկողները Աբովյանի գործող քաղաքապետ՝ Գագիկ Ծառուկյանի փեսա Կարապետ Գուլոյանի մարդիկ են եղել: Նրանց մեջ չմարած փողային հարցեր են եղել, որոնք էլ դարձել են հաշվեհարդարի պատճառ: Դեպքից հետո, երբ Իսրայելյանը բորբոքված «ելույթ» է ունեցել օլիգարխների, նրանց զավակների ու 9-ով հարուստ պետհամարանիշով ավտոմեքենաների մասին, Ծառուկյանը զանգահարել է նախկին քաղաքապետին՝ հորդորելով իր դեմ դուրս չգալ, և անջատել է հեռախոսը: Հենց դրանից հետո էլ Կարո Իսրայելյանը «հասկացել է»՝ լավ են արել, որ իրեն ծեծել են: Եթե պետք լինի, մի անգամ էլ կարող են ծեծել:
Իսրայելյանը, սակայն, մեզ հետ զրույցում հերքեց, թե գործող քաղաքապետը որևէ առնչություն ունի կատարվածի հետ: Գուլոյանն իր երեխան է՝ ասաց: «Չէ-չէ, նա բոլորովին կապ չունի, բոլորովին: Եթե ասեմ, որ նպատակային են իմ վրա հարձակվել՝ չէ: Իսկ գործող քաղաքապետը իմ երեխան ա, իմ ընկերոջ՝ Ծառուկյան Գագոյի փեսան ա, իրա հայրը իմ ընկերն ա, ինքն էլ իմ երեխան ա, ինձ էլ պապի ա ասում: Փողոցում, երբ ռաստա գալիս, պապի ա ասում: էնպես որ՝ նա կապ չունի: Դե, հիմա եղել ա, ջահել են, Աստված իրանց հետ»,- ասաց նախկին քաղաքապետը:
Իսրայելյանին անգամ հետաքրքիր չէ ծեծից հետո հարուցված քրեական գործի ճակատագիրը: «Ինչ ուզում են՝ անեմ: Ուզում են՝ 3 լումա տուգանեն, ուզում են՝ ընդհանրապես չտուգանեն»,- ասաց մեր զրուցակիցը՝ հավելելով, որ իր համար ավելի լավ կլիներ, որ իրեն ծեծի ենթարկողի ծնողները գային, ասեին՝ դե, տղա է, մի ղալաթ արել է: Ինքն էլ կասեր՝ դե, էնպես արեք, որ մյուս անգամ էդ ղալաթը չանի, ու ամեն ինչ կավարտվեր:
«Թե չէ՝ հո չե՞նք դնի իրար սպանենք: Կամ վրեժխնդիր լինեմ: Տղա են, էլի, ինչ ա եղել: Ծեծվել եմ, հո չեմ մեռել: Ծեծվել եմ, հիվանդանոց եմ ընկել, կապտուկներս քիչ-քիչ անցնում են, դրանով էլ կավարտվի: Ես էլ եմ մի-երկու ապտակ տվել՝ մինչև ուշքս գնալը, գիտեք չե՞մ խփել: Ինքն էլ ինձ ա բոքսել, քվիտ ենք եղել, պրծել գնացել ա:
Ես եմ մեղավոր, գիշերվա ժամը 3-ին ինչի քշեցի գնացի Ծաղկաձոր, ինչի էդ ժամին պիտի մեն-մենակ գնայի, որ տենց բան էլ լիներ»:
Իսրայելյանը դեմ է անգամ, որ իրեն ծեծի ենթարկած երիտասարդներին ձերբակալեն: «Չէ հա, ինչի՞ պիտի ձերբակալեն, ի՞նչ են արել որ, հո չե՞ն սպանել: Ես չեմ կարծում, որ ձերբակալման խնդիր առաջանա: Պետք է մի քիչ էլ մեծահոգի լինել: Էն ժամանակ ջղայնացած էի, ուզում էի, որ պատժվեն, իսկ հիմա՝ ոչ: Ջահել են, թող գնան: Սա էլ իմ բարությունն էր, որ քթիցս էկավ: Լավ ա եղել, չեմ դժգոհում, սա թող ինձ խրատ լինի, որ գիշերները մենակ դուրս չգամ»,- իրենից գոհ հայտարարեց ծեծի ենթարկված, դեռևս ծռմռված նախկին քաղաքապետը, ով իրեն նահապետ է համարում: