«Առաջին լրատվական»-ի տեղեկություններով՝ առաջիկայում քննիչի որոշմամբ փոփոխվելու է Վերնիսաժի կրակոցների հեղինակ ԲՀԿ-ական պատգամավոր Կարո Կարապետյանի՝ Յուվեցի Կարոյի փեսա Գոռ Առաքելյանի խափանման միջոցը:
Հիշեցնենք, որ օրերս նրա նկատմամբ դատարանը կեսամսյա կալանք կիրառվեց: Նա մեղադրվում է ՀՀ Քրեական օրենսգրքի 34-104 հոդվածի 1, 6, 10 կետերի հատկանիշներով` «խուլիգանական դրդումներով սպանության փորձ շատերի կյանքի համար վտանգավոր եղանակով» (ըստ օրենսգրքի, պատժվում է ազատազրկմամբ` տասներկուսից քսան տարի ժամկետով, կամ ցմահ ազատազրկմամբ) և 235 հոդվածի 1-ին մասի հատկանիշներով` «ապօրինի կերպով զենք ձեռք բերելը, իրացնելը, պահելը, փոխադրելը կամ կրելը» (3 ամիս կալանքից մինչև երեք տարվա ազատազրկում):
Վերնիսաժի կրակոցներից տուժած երկու երիտասարդները՝ Վալերի Հովհաննիսյանը եւ Նորայր Հարությունյանը, դեռ հիվանդանոցում են, նրանց նկատմամբ հսկողությունը շարունակվում է եւ դեռեւս որեւէ քննչական գործողություն չի կատարվել: Այս մասին «Առաջին լրատվական»-ի հետ զրույցում ասաց Վալերի Հովհաննիսյանի պաշտպան Վարդուհի Էլբակյանը: «Վալերի Հովհաննիսյանի վիճակը կայուն ծաներ է: Նա ծանր մարմնական վնասվածքներ ունի: Իսկ Նորայրի վիճակը կայուն է, բայց նա դեռ չի քայլում: Նրանց նկատմամբ մինչ այս պահը որեւէ քննչական գործողություն չի կատարվել»,- ասաց Էլբակյանը: Նա, անդրադառնալով տեղեկությանը, որ առաջիկայում հնարավոր է՝ Գոռ Առաքելյանի խափանման միջոցը փոխվի, արձագանքեց. «Պաշտպանը իր պաշտպանական տակտիկան ինքն է մշակում: Ինքն այս պահին ավելի շատ նյութերի է տիրապետում, քանի որ իր պաշտպանյալը կարգավիճակ ունի եւ դատարանում ներկայացված որոշակի ցուցմուքների տիրապետում է: Դրանից էլ բխում է իր տակտիկան: Բայց, որ խափանման միջոցը փոխվելու է, նոր եմ լսում: Բայց ես հայաստանյան պրակտիկայում չեմ հանդիպել, որ 34-104 հոդվածի երկրորդ մասով մեղադրվող անձի նկատմամբ այլ խափանման միջոց ընտրվի»:
Տիկին Էլբակյանը նաեւ ասաց, որ հնչած կրակոցներից տուժած պատահական անցորդները բողոք չեն ներկայացրել: «Որքանով ինձ հայտնի է, բողոքներ չկան: Բացարձակ նրանց հետ չեմ զրուցել եւ չեմ կարող ասել, թե ինչի համար են նրանք այդպես վարվել: Նրանց փոխարեն չեմ կարող պատասխանել: Միգուցե եւ նրանց փոխհատուցել են, հիվանդանոցային ծախսերը հոգացել են, բայց չեմ կարող ասել: Ընդամենը կարող եմ ենթադրել»:
Փաստաբանից հետաքրքրվեցինք՝ զրուցե՞լ է իր վստահորդների հետ՝ պարզելու համար ինչ է իրականում կատարվել: «Վալերիի հետ դեռեւս չեմ զրուցել, գործը չեմ քննարկել նրա հետ, իսկ Նորայրը բացարձակապես չի ցանկանում խոսել կատարվածի մասին: Ասում է, որ ինքը որեւէ բացատրություն չունի տալու: Բայց, համենայնդեպս, ամեն ինչ այնպես էլ չի, ինչպես փորձ է արվում մամուլում ներկայացնել, կամ ինչպես փորձում են որոշ բարձրաստիճան պաշտոնյաներ ներկայացնել»,- ասաց Վարդուհի Էլբակյանը:
