Կենտրոն և Նորք-Մարաշ վարչական շրջանների ընդհանուր իրավասության դատարանի դատավոր Արմեն Բեկթաշյանը հրապարակեց որոշումը Հեղինե Պետրոսյանի ներկայացուցիչներ Արթուր Սաքունցի և Արայիկ Զալյանի դիմումի վերաբերյալ:
Հեղինե Պետրոսյանը Հայկ Մովսիսյանի մայրն է: Հայկը ողջ չէ, նա ինքնասպանություն է գործել Շուշիի ՔԿՀ-ում:
1993 թվականին ծնված ու 2011 թվականի հունիսի 15-ին զորակոչված Հայկի Մովսիսյանը 2012 թվականի նոյեմբերի 28-ին Շուշիի ՔԿՀ-ի 8-րդ խցում կախվելու միջոցով ինքնասպանություն էր գործել:
2012 թվականի նոյեմբերի 20-ի դատավճռով Սյունիքի մարզի ընդհանուր իրավասության դատարանը Հայկ Մովսիսյանին դատապարտել էր 3 տարի ազատազրկման:
Զինծառայության համար ոչ պիտանի ճանաչված հիվանդ երիտասարդին պաշտպանության նախարարը զորացրել էր, իսկ ծառայության տասներկուերորդ օրը նյարդային վիճակում երակները սայրով կտրելու համար նույն զինվորին դատարանը դասալիք էր ճանաչել ու ազատազրկման դատապարտել…
Վճռաբեկ դատարանը բեկանել է վերաքննիչ քրեական դատարանի արդարացման որոշումը՝ բավարարելով գլխավոր դատախազի պաշտոնակատարի բողոքը, բեկանել է նաև ընդհանուր իրավասության դատարանի դատավճիռը և իր կողմից դադարեցրել է Հայկ Մովսիսյանի քրեական հետապնդումը, քրեական գործի վարույթը կարճել է՝ Մովսիսյանի մահվան կապակցությամբ:
Հեղինե Պետրոսյանի ներկայացուցիչներ Արթուր Սաքունցը և Արայիկ Զալյանը դիմել էին Կենտրոն և Նորք-Մարաշ վարչական շրջանների ընդհանուր իրավասության դատարան՝ պահանջելով, որ Հայկ Մովսիսյանը ճանաչվի որպես տուժող, Հեղինե Պետրոսյանը՝ տուժողի իրավահաջորդ: Ինչպես նաև պահանջել էին, որ դատարանը պարտավորեցնի ՀՔԾ ավագ քննիչ Մ. Բաբայանին՝ տրամադրելու քրեական գործի վարույթը կարճելու մասին որոշումը և կարճված գործի նյութերի պատճենները: Դիմումատուները ներկայացրել էին դատաբժշկական փորձաքննության եզրակացություն, համաձայն որի՝ ինքնասպան եղած Հայկ Մովսիսյանի մարմնին առկա են եղել վնասվածքներ: Գոնե այդ վնասվածքների առկայության փաստով Հայկ Մովսիսյանը պետք է որ տուժող ճանաչվեր…
Դատարանը մերժեց Սաքունցի և Զալյանի դիմումը:
Որոշման հիմնավորումները հայտնի կլինեն որոշման տեքստը պատրաստ լինելուց հետո: