Անկասկած սոցիալական ցանցերը` մասնավորապես, և ինտերնետն` ընդհանրապես, մեծ նշանակություն ունեցան բռնապետական ռեժիմների դեմ պայքարի վերջին դեպքերի ժամանակ: Այդ իսկ պատճառով ամերիկյան իշխանությունները որոշել են 2011 թ. մոտ 25 մլն դոլար հատկացնել այդ երկրների ինտերնետ-ակտիվիստներին և բլոգերներին: Այս մասին հայտնել է ԱՄՆ պետքարտուղար Հիլարի Քլինթոնը, գրում է BBC-ն:
Ըստ Քլինթոնի` Օբամայի վարչակազմը աջակցություն է ցուցաբերում ինտերնետի այն ակտիվիստներին, որոնց իրավունքները խախտվում են: Նրանց ցուցաբերվելու է այնպիսի տեխնիկական աջակցություն, որպեսզի մեկ քայլ առաջ լինեն իրենց գործունեությունը սահմանափակողներից:
Ըստ Քլինթոնի` սոցիալական ցանցերը` Twitter-ն ու Facebook-ը, հնարավորություն են տալիս մարդկանց ինքնաարտահայտվելու: Նա կարծում է, որ հետ դարձի ճանապարհ չկա աճող և զարգացող ինտերնետ համայնքի համար:
Քլինթոնը նաև հայտնել է, որ անցած շաբաթ, ի հավելումն պետքարտուղարության կողմից Twitter-ում բացված արաբերեն և պարսկերեն միկրոբլոգների, շուտով միկրոբլոգներ կլինեն նաև հնդկերենով, չինարենով և ռուսերենով:
Ըստ Քլինթոնի՝ աշխարհի պետությունների ղեկավարներն ունեն ընտրություն. Կա՛մ նրանք թույլատրում են, որպեսզի ինտերնետն ազատ զարգանա և իրենց վրա պատասխանատվություն են վերցնում ազատության և իրավունքների հանդեպ իրենց ժողովուրդների մոտ աճող պահանջների համար, կա՛մ էլ սահմանափակում են ինտերնետի օգտագործումը, ճնշում են ազատությունները, և հետևաբար կորցնում են այն սոցիալական և տնտեսական առավելությունները, որ հասարակությանը տրամադրում են սոցիալական ցանցերը: