Սեպտեմբերի 9-ին Շիրակի մարզի 119 համայնքներից 86-ում անցկացվելու են տեղական ինքնակառավարման մարմինների ընտրություններ: Չնայած բավականին քիչ ժամանակ է մնացել, բայց քաղաքական որոշ կուսակցություններ դեռ չեն կողմնորոշվում, թե ում թեկնածությունն են առաջադրելու` ասենք Գյումրու քաղաքապետի պաշտոնում: Կուսակցությունների տեղի գրասենյակներում սպասում են քաղաքական խորհուրդների որոշմանը:
Նույն վիճակն է նաև մարզի երկրորդ քաղաքում` Արթիկում: Այստեղ իր թեկնածությունն է պատրաստվում առաջադրել գործող քաղաքապետը` Խաչատուր Վարագյանը: Այս փաստը հաստատեցին նաև քաղաքապետարանում: Ըստ քաղաքապետի տեղակալ Գևորգ Փթուկյանի՝ համայնքի հանրապետական ղեկավարը սպասում է կուսակցության քաղաքական որոշմանը: Շրջանառվում է նաև նախկին քաղաքապետ Հմայակ Աբրահամյանի անունը, որը մոտ 10 տարի զբաղեցրել է այդ պաշտոնը: Գևորգ Փթուկյանից փորձեցինք տեղեկանալ՝ կուսակցության քաղխորհուրդն արդյոք ընտրություն կատարելո՞ւ է հանրապետական երկու թեկնածուների միջև: «Այդ մասին ասել չեմ կարող, կուսակցությունն է որոշում կայացնում»,- եղավ Փթուկյանի պատասխանը:
Կան տեղեկություններ, որ քաղաքապետի երրորդ հավանական թեկնածուն «Բարգավաճ Հայաստան» կուսակցությունից է: Ինչպես հայտնի է, Արթիկի քաղաքապետ Խաչատուր Վարագյանի եղբայրը խորհրդարանական ընտրությունների ժամանակ պարտվեց ԲՀԿ-ական Մուշեղ Պետոյանին: Հետևաբար չի բացառվում, որ «Բարգավաճ Հայաստան» կուսակցությունն իր այս հաջողությունը ցանկանա կրկնել` առաջադրելով քաղաքապետի իր թեկնածուին: Չի բացառվում, որ Արթիկում առաջադրվեն նաև ՀՅԴ և ՕԵԿ թեկնածուներ:
Թեժ է լինելու ընտրապայքարը նաև մարզի գյուղական բնակավայրերում: Հատկապես թեժ ընտրապայքար է սպասվում մարզի Ախուրյան և Ազատան համայնքներում: Ախուրյանի գործող գյուղապետ ՀՅԴ անդամ Արծրունի Իգիթյանը նշեց, որ պատրաստվում է առաջադրել իր թեկնածությունը, իսկ թե ով կամ ովքեր են լինելու իր քաղաքական մրցակիցները Արծրունի Իգիթյանը նշեց, որ տեղյակ չէ: Այն, որ գործող գյուղապետերը ամեն գնով ցանկանում են վերընտրվել, արդեն իսկ ակնհայտ է: Այս օրերին որոշ գյուղական համայնքներ տանող ճանապարհներ ասֆալտապատվումեն:
Փայլակ Ֆահրադյան
«Առաջին լրատվական»-ի Շիրակի մարզային թղթակից
