Ֆրանսիայի Ազգային խորհուրդը (խորհրդարանի Ստորին պալատը) այս գիշեր ընդունել է ընթացիկ տարում բյուջեում կատարված փոփոխությունները, համաձայն որոնց` նախատեսվում է հարկահավաքության բարձրացում` 7.2 մլրդ եվրոյով, և պետական ծախսերի կրճատում` 1.5 մլրդ եվրոյով:
Տվյալ փաստաթուղթը, որի քննարկման համար պահանջվել է 4 օր, չեղյալ է հայտարարել երկրի նախկին նախագահ Նիկոլա Սարկոզիի` հասարակական մեծ հնչողություն ձեռք բերած բարեփոխումների մեծ մասը:
Փոփոխություններին կողմ են եղել ձախ ուժերը ներկայացնող պատգամավորները, որոնք Ազգային խորհրդում իշխող մեծամասնություն են կազմում: Աջ հայացքների հարող «Ժողովրդական շարժման աջակցության միության» անդամներն ու կենտրոնամետները դեմ են քվեարկել փոփոխություններին:
Օրինագիծը քննարկելիս հատկապես վեճեր են ծագել ԱԱՀ-ի դրույքի շուրջ, որը այս տարվա հոկտեմբերին ծրագրվում էր ավելացնել 19.6 -ից մինչև 21.2 տոկոսով: Այդկերպ հանրապետությունը աշնանը կհամալրեր այն երկրների թիվը, որտեղ պետական հարկերի ստանդարտ տոկոսադրույքը ամենաբարձրն է:
Սարկոզիի օրոք կատարված այս բարեփոխումը կոչված էր փոխհատուցելու այն սոցիալական հատկացումները, որոնք նախկինում վճարում էին ձեռնարկությունները, սակայն այժմ, սոցիալիստների կամքով, ԱԱՀ-ն չի բարձրանա:
Ձախերը չեղյալ են հայտարարել Սարկոզիի օրոք ընդունված` արտաժամյա աշխատող մարդկանց տրվող սոցիալական ու հարկային արտոնությունները:
Այսպիսով` երկրի նորընտիր նախագահը կատարել է ներքին քաղաքականությանը վերաբերող իր նախընտրական խոստումների մի մասը:
Հաջորդ շաբաթ օրինագծի քննարկմանը ձեռնամուխ կլինի նաև Ֆրանսիայի խորհրդարանի Վերին պալատը:
